Зеленский Ермакни президент девони раҳбари лавозимидан бўшатишдан бош тортди

Володимир Зеленский «Энергоатом» энергетика соҳасидаги давлат компанияси атрофидаги коррупция можароси фонида ўзининг яқин ҳамкори Андрей Ермакни Украина президенти девони раҳбари лавозимидан бўшатишдан бош тортди. Зеленскийнинг бу рад жавобини ўз фракцияси «Слуга народа» партияси депутатлари билан учрашуви чоғида билвосита маълум бўлди, деб хабар берди «Украинская правда» ва Hromadske нашрлари пайшанба, 20 ноябр куни.

Учрашувда депутат Маряна Безуглая давлат раҳбаридан президент девони раҳбарини ва бошқа амалдорларни ишдан олишни режалаштираётгани ёки йўқлиги ҳақида сўради. «Зеленский президент девонидаги кадрлар масаласи президентнинг масъулияти эканини айтди ва Ермак истеъфога чиқарилмаслигини билдирди», – деди «Украинская правда»га Зеленский билан мулоқотда қатнашганлардан бири. Шу билан бирга, Верховная рада депутати Фёдор Вениславскийга таяниб «Украинская правда» ёзишича, «Слуга народа» аъзоларининг «анча катта қисми» Андрей Ермак истеъфога чиқиши керак, деб ҳисоблайди.

Украина Миллий коррупцияга қарши бюроси (НАБУ) ва Махсус антикоррупция прокуратураси (САП) 10 ноябр куни «Энергоатом» атрофидаги йирик коррупция схемасини фош этгани ҳақида маълум қилди. Можаро марказида Украина ҳукуматининг бир қатор вазирлари, шунингдек президентнинг кўп йиллик ҳамкори Тимур Миндич ва молиячи Александр Цукерман қолди. Шу куни ҳуқуқни муҳофаза қилувчи органлар Миндичнинг уйида, «Энергоатом»да, шунингдек Украина адлия вазири Герман Галушченконинг офисида тинтув ўтказди. Миндич эса бундан сал олдинроқ Украинани тарк этган эди.

Зеленский 12 ноябр куни икки кун олдин вазифаларини бажаришдан четлатилган Галушченкони ва энергетика вазири Светлана Гринчукни лавозимидан озод этишни талаб қилди. Олий рада 19 ноябр куни ҳар икки вазирнинг истеъфоси учун овоз берди. Миндич ва Цукерманга нисбатан эса Зеленский фармонига мувофиқ санкциялар жорий этилди.