Титан қоришмаларидан ясалган маҳсулотларни ишлаб чиқарувчи ва етказиб берувчи, штаб-квартираси Мюнхенда жойлашган Германиянинг Hermith GmbH компанияси Россия билан бизнес алоқаларини узди, етказиб бериш, ишлаб чиқариш ва РФ билан боғлиқ тузилмаларда иштирокини тўхтатди. Бу ҳақда Hermith вакили 20 ноябр куни DW’нинг сўровига жавобан маълум қилди. Сўров Correctiv немис порталида компания тилга олинган таҳлилий материал чоп этилганидан кейин юборилган эди.
«Европа Иттифоқи санкциялари ва Россиянинг жавоб чоралари, экспорт лицензияларини бериш тартиби, тўловларни амалга ошириш мураккаблашиши, шунингдек ҳамкорликни тўхтатиш зарурати билан боғлиқ маънавий омиллар фаолиятни давом эттиришни деярли йўққа чиқарди. Шу сабабли Россиядаги операциялар тўхтатилди», – дея маълум қилди Hermith.
Компания вакили ҳамкорлик аниқ қачон тўхтатилганини айтмади, фақат «уруш бошланганидан кейин» рўй берганини билдириш билан чекланди. Гап Россиядаги бизнесни қайта тузиш ҳақида эмас, балки етказиб бериш ва маҳсулотлардан тўлиқ воз кечиш ҳақида бораётганини Hermith алоҳида урғулади. Компания Россиянинг ўрнига хомашё етказиб берувчи сифатида Хитойдаги ишлаб чиқарувчиларни тилга олди.
Hermith ўзини «Европадаги етакчи титан ишлаб чиқарувчи ва етказиб берувчилардан бири» деб атайди. Компания маълумотларига кўра, у йилига тахминан 1000 тонна титан маҳсулотлари ишлаб чиқаради ва 300 тонна атрофида захира омборига эга. Компания 2004 йилда россиялик тадбиркор Алексей Рассказов томонидан ташкил этилган. У 90-йилларда Россияда банк секторида ишлаган, кейинроқ Европа фондлари ва тузилмаларида турли лавозимларни эгаллаган, шундан сўнг Германияда ўз компаниясини очган. Бизнесмен титаннинг дунёдаги асосий ишлаб чиқарувчи ва экспортчилари қаторига кирадиган Россия билан жуда қаттиқ боғланган эди. Рассказов Германия фуқаролигига ҳам эга.
2017 йилда Бавария компанияси «Росатом» таркибидаги «Чепецкий механический завод» (ЧМЗ) билан Европага 1000 тоннага яқин титан маҳсулотлари етказиб бериш бўйича узоқ муддатли шартнома имзолаган. Битим ўша пайтдаги Бавария бош вазири, Германиянинг собиқ ички ишлар вазири Хорст Зеехофер ва Россия иқтисодий ривожланиш вазири Максим Орешкин иштирокида тузилган.
Hermith’нинг Россия билан ҳамкорлиги бу билан чекланиб қолмаган: 2019 йилда компания «Росатом»нинг «ТВЭЛ» ёнилғи компанияси ҳамкорига айланди. 2021 йилда эса шу компания билан биргаликда авиация учун қувурлар ишлаб чиқаришга ихтисослашган Hermith Aerospace қўшма корхонасини тузди. Рассказов ўшанда уларнинг маҳсулоти Airbus, Embraer ва Bombardier каби йирик авиасозлик компанияларини қизиқтирганини айтган эди. Битим имзоланганидан ярим йил ўтиб, Россия Украинага ҳужум бошлади.
