Тошкентда чангга қарши кураш доирасида ўнлаб фаввора ва суғориш тармоғи ишга туширилди

Тошкент шаҳрида ҳавони намлаш орқали чангланишни камайтириш мақсадида жами 93 та сув сепиш техникаси ҳамда 95 та фаввора фаолият олиб бормоқда. 34 та каналдан 40 та ариқ ва лотокларга сув етказиб берилиб, умумий суғориш тармоғининг 247 километрини ташкил этмоқда. Бу ҳақда Тошкент шаҳрида экологик вазият бўйича махсус комиссия раҳбари, Экология қўмитаси раиси Азиз Абдуҳакимов хабар берди.

Унинг сўзларига кўра, қуйидаги вазифалар устувор этиб белгиланди:

- эскирган ва яроқсиз шиналар айланмасини назорат қилиш;

- ариқлар тизимини тиклаш;

- саноат-корхоналари томонидан атроф-муҳитга чиқариладиган ташланмалар ҳажмини вақтинчалик икки баробарга камайтириш;

- қурилиш объектларини топширишда 25 фоиз ер майдонини яшиллик билан қоплаш ва автотранспорт ғилдиракларини ювиш ва сув сепиш мосламаларини ўрнатишни таъминлаш бўйича назорат рейдлари амалга оширилмоқда.

Қайд қилинишича, шаҳар ҳудудида усти очиқ ҳолда ҳаракатланаётган ва атроф-муҳитни ифсолантираётган юк транспорт воситаларига нисбатан чоралар кўрилмоқда.

Азиз Абдуҳакимовнинг таъкидлашича, махсус комиссия томонидан ўрнатилган назорат вақтинчалик эмас, тизимлидир.