Яшнобод туманидаги озиқ-овқат дўконида ёнғин содир бўлди

Тошкент шаҳар Яшнобод туманида, Авиасозлар кўчасида жойлашган озиқ-овқат дўконида 30 ноябр куни туш пайти ёнғин содир бўлди. Ёнғин-қутқарув бўлинмалари тезкор етиб келиб, ёнғин қисқа вақт ичида ўчирилди, жабрланувчилар қайд этилмади.

Фото: Ижтимоий тармоқлар

Кеча, 30 ноябр куни соат 12:41 да Тошкент шаҳар Яшнобод туманида жойлашган озиқ-овқат дўконида ёнғин содир бўлгани ҳақида 112 ягона тезкор ҳаракат тизими орқали шаҳар ФВБга хабар келиб тушган.

Маълумотга кўра, ёнғин-қутқарув бўлинмалари соат 12:47 да ҳодиса жойига етиб борган. Ёнғин соат 12:58 да қуршаб олинган ва соат 13:07 да тўлиқ ўчирилган.

Ҳозирда ёнғин келиб чиқиш сабаби ва етказилган моддий зарар миқдори ўрганилмоқда. Ёнғин натижасида тан жароҳати олганлар қайд этилмаган.