Samsung ўзининг биринчи уч букланадиган Galaxy Z TriFold смартфонини тақдим этди

Samsung ниҳоят ўзининг илк уч қисмли букланадиган смартфонини — Galaxy Z TriFold'ни тақдим этди. Бу дунёдаги учинчи trifold смартфон бўлиб, Huawei Mate XT ва Mate XTs’dan кейин келади. Қурилма Жанубий Кореяда 12 декабрдан сотувга чиқади, глобал бозорга эса 2026 йил бошида киради.

Фото: Аббосхон Юсуфжонов

Galaxy Z TriFold экранни “G” харфи шаклида буклайди: иккита ён панел марказий экран қисмини ёпиб, чанг ва тирналишдан ҳимоя қилади. Шунингдек, смартфоннинг ташқи фойдаланиш учун мўлжалланган алоҳида 6,5 дюймли экрани ҳам мавжуд.

Қурилма 10 дюймли ички Dynamic AMOLED 2X экран, Snapdragon 8 Elite процессори, 16 GB оператив ва 1 TB доимий хотира билан жиҳозланган. Батарея сиғими 5600 мА·соат, 45 Вт тез зарядлаш ва 15 Вт симсиз зарядлаш имкониятини қўллаб-қувватлайди.

Galaxy Z TriFold’да 5 та камера мавжуд: асосий 200 MP, кенгбурчак 12 MP, телефото 10 MP ва иккита олд камера — ташқи ва ички, ҳар бири 10 MP. Қурилма IP48 ҳимояга эга ва тўлиқ очилгандаги қалинлиги атиги 3,9 мм. Рамкаси алюминий ва титан, орқа қопқоғи карбонсимон полимер материалдан тайёрланган.

Смартфон фақат қора (Crafted Black) рангда чиқарилади. Samsung ҳали нархини расмий эълон қилмаган, аммо инсайдерлар уни 1999–2499 доллар оралиғида баҳолашмоқда.

Технологиялар тез ўзгараётган бугунги кунда энг сўнгги янгиликлардан хабардор бўлиш муҳим. Рақамли дунёда адашиб қолмаслик ва шундай янгиликларни биринчилардан билиш учун KUN.UZ Texnologiya Телеграм саҳифасини кузатиб боринг.