Wise Россия ва Беларус фуқароларининг карталарини ЕИ санкциялари асосида блоклади

Янги чекловлар Россиянинг Украинага қарши давом этаётган уруши муносабати билан қабул қилинган ЕИнинг 19-санкция пакети талабларига мувофиқ жорий этилди, деб хабар берилади душанба куни, 1 декабрда, Wise сайтида.

Баёнотда таъкидланишича, картани блокдан чиқариш учун 30 январга қадар мижоз ўз фуқаролигини ёки ЕИҲга кирувчи мамлакатлар (ЕИ давлатлари, Норвегия, Исландия, Лихтенштейн, Швейцария)дан бирининг вақтинчалик ёки доимий яшаш рухсатномасини тасдиқлатиши керак. Компания бу ўзгаришлар ҳақида улар тааллуқли бўлган барча мижозларни хабардор қилган.

Текширув якунлангунча бу мижозлар карталаридан харидлар учун фойдалана олмайди, банкоматдан нақд пул ололмайди, картаси реквизитлари орқали обуна тўловларини ҳам амалга ошира олмайди.

Талаб этиладиган фуқаролик ёки яшаш учун рухсатномага эга бўлмаган мижозлар Wise’нинг рақамли ёки пластик карталаридан энди умуман фойдалана олмайди. Шу билан бирга улар сервиснинг бошқа хизматларидан — пул юбориш, сақлаш, қабул қилиш ва конвертация қилиш имкониятларидан ҳали фойдаланади, дейилади компания баёнотида.

Европа Иттифоқининг 19-санкция пакети октябр ойи охирида маъқулланган бўлиб, унга, жумладан, “Россия фуқароларига электрон пул беришга” тақиқ ҳам киритилган. Хусусий тартибда худди шундай чекловлар Беларус фуқароларига нисбатан ҳам жорий этилган.

Ушбу пакет қабул қилинганидан сўнг Европада яшовчи айрим россияликларнинг ҳисоб рақамлари Revolut интернет банки томонидан блоклангани маълум бўлди. ОАВ маълумотларига кўра, бу чора, жумладан, гуманитар виза эгаларига, шунингдек яшаш учун рухсатномаси муддати узайтирилмаганларга тааллуқли бўлган. Кейинчалик уларнинг бир қисмида ҳисоблар қайта очилгани хабар қилинди, бироқ бошқа банк ва тўлов платформаларида, жумладан Paysera хизматида ҳам шунга ўхшаш ҳолатлар қайд этилган.