Франция ва Украина президентлари Эммануэл Макрон ва Володимир Зеленский Киев ва Москва ўртасидаги эҳтимолий тинчлик келишуви шартларини муҳокама қилди. Душанба куни, 1 декабрда, Елисей саройида бўлиб ўтган бир неча соатлик учрашув давомида улар, шунингдек, бир кун олдин Флоридада ўтган Украина ва АҚШ делегациялари музокаралари натижаларига алоҳида эътибор қаратди.
Украина президенти Зеленский учрашув якунидан сўнг билдиришича, асосий мавзу — АҚШнинг Украинада урушни тўхтатиш режаси ва Киев учун хавфсизлик кафолатлари бўлган.
«Тинчлик чинакам мустаҳкам бўлиши керак. Уруш имкони борича тезроқ тугаши лозим. Ҳозир жуда кўп нарса ҳар бир етакчининг иштирок даражасига боғлиқ», — деб ёзди у X ижтимоий тармоғида.
Елисей саройи хабарига кўра, учрашув чоғида Макрон ва Зеленский Украинадаги тинчликни таъминлаш масалаларини бир қатор Европа давлатлари раҳбарлари билан ҳам муҳокама қилди. Улар, жумладан, Германия канцлери Фридрих Мерцга, Буюк Британия бош вазири Кир Стармерга, шунингдек, НАТО бош котиби Марк Рюттега алоҳида телефон қўнғироқларини амалга оширган.
Зеленский маълум қилишича, музокараларга, шунингдек, Украина Миллий хавфсизлик ва мудофаа кенгаши (СНБО) котиби Рустем Умеров ҳамда Флоридадаги музокараларда иштирок этган АҚШ президентининг махсус вакили Стивен Уиткофф ҳам қўшилган.
Ўз навбатида Умеров X ижтимоий тармоғида АҚШда бўлиб ўтган, эҳтимолий тинчлик келишуви ҳақидаги музокараларда «сезиларли олға силжиш»га эришилганини ёзди ва америкалик шерикларга «конструктив ва шерикликка асосланган ёндашув» учун миннатдорлик билдирди. Шу билан бирга, «айрим масалаларни янада такомиллаштириш талаб этилади», деб қўшимча қилди у.
Умеровнинг сўзларига кўра, Украина делегацияси Флоридадаги музокаралар натижалари бўйича ҳисобот тайёрламоқда ва уни Зеленскийга Европа ҳудудида бўлиб ўтадиган учрашув вақтида тақдим этади. Унинг айтишича, ўзи ҳам музокаралар гуруҳи билан бирга Европа томон йўлга чиққан.
Франция ташқи ишлар вазири Жан-Ноэл Барро музокаралар бошланишидан олдин қилган баёнотида Украинада тинчликни сиёсий йўл билан ҳал этиш жараёни европаликлар иштирокисиз кечиши мумкин эмаслигини таъкидлади. Шу билан бирга, у Европа АҚШ режаси бўйича муҳокамалар давомида Киев манфаатлари йўлида бир қатор имтиёзларга эришганини қайд этди. Бу ҳақда Барро France Culture радиостанцияси эфирида гапирди.
Аввалроқ Флоридада бўлиб ўтган Украина ва АҚШ делегациялари музокаралари «самарали ва муваффақиятли» бўлган, деб баҳо берди Украина делегацияси раҳбари, СНБО котиби Рустем Умеров.
