АҚШ БМТнинг украиналик болаларни қайтариш тўғрисидаги резолюциясини қўллаб-қувватлади

АҚШ ва яна 90 та давлат 3 декабр, чоршанба куни БМТ Бош Ассамблеясининг 11-чақириқдаги фавқулодда махсус сессиясида Россиядан «зўравонлик билан кўчирилган ёки депортация қилинган» барча украин болаларни «дарҳол, хавфсиз ва мутлақо шартсиз равишда» қайтаришни талаб қилувчи резолюция учун овоз берди. Ташкилот сайтида хабар қилинишича, шу овозлар ҳужжатни қабул қилиш учун етарли бўлди.

«Украиналик болаларни қайтариш» номли резолюцияни, жумладан, Украина ва Канада таклиф этган, у бўйича овоз беришда жами 160 та давлат иштирок этди. Ҳужжатга Россия, Беларус, Куба, Эрон, КХДР, Мали ва Суданни ўз ичига олган 12 та давлат қарши чиқди, яна 57 та давлат бетараф қолди. Қизиқ томони шундаки, резолюцияни Россияни танқид қилувчи қарорларга бир неча марта қарши овоз берган Доналд Трамп Оқ уйга қайтганидан сўнг АҚШ ҳам қўллаб-қувватлади.

Ҳужжатда, шунингдек, Россия «болаларни идеологик қайта ишлаш» амалиётидан, уларни ота-оналаридан ажратишдан, шунингдек, болаларнинг шахсий мақомини ўзгартиришдан — жумладан фуқаролик бериш ва уларни васийликка олувчи оилаларга топширишдан воз кечишга «қатъий тарзда чақирилган». Украина ташқи ишлар вазири ўринбосари Маряна Беца сўзларига кўра, Россия камида 20 минг украиналик болани депортация қилган, уларнинг айримларини қайтаришга муваффақ бўлинган.

Резолюция бўйича овоз беришдан олдин Россиянинг БМТдаги доимий ваколатхонаси раҳбар ўринбосари Мария Заболотская махсус сессиянинг мақсади «украин инқирози бўйича узоқ муддатли тинчлик ечимига эришиш жараёнини издан чиқариш»дан иборат, деб баёнот берди. Унинг таъкидлашича, ҳужжат «гўёки Россия томонидан болалар депортация қилиниши» ҳақидаги позицияни илгари суришга қаратилган, тилга олинаётган 20 минг бола ҳақидаги рақам эса «ҳеч қандай рўйхатлар, ота-оналар ва қариндошлар сўровлари билан тасдиқланмайди».

Заболотскаянинг айтишича, бу масалада Халқаро Қизил Хоч Қўмитаси, Ватикан ва Қатар воситачи сифатида иштирок этмоқда, Россия эса АҚШ биринчи хоними Мелания Трампнинг украиналик болаларни оилалари билан қайта бирлаштиришга кўмаклашиш ташаббусини қўллаб-қувватлаган. Унинг сўзларига кўра, болаларнинг бир қисми Украинадан Россияга қайтарилаётгани ҳолатлари ҳам мавжуд.

Украина бир неча марта Россияни босиб олинган ҳудудлардан украин болаларни Россияга олиб кетишда айблаб келган. Улар берган маълумотларга кўра, 2022 йилдан бери Украинадан 19,5 мингдан ортиқ бола депортация қилинган, шулардан 1605 нафарини қайтаришнинг иложи бўлган. Оккупация қилинган ҳудудлардан болаларни Россияга олиб ўтиш Ҳаагадаги Халқаро жиноий суд (ХЖС)нинг Владимир Путин ва Россиянинг болалар ҳуқуқи бўйича вакили Мария Лвова-Беловага нисбатан қўлга олиш ордери чиқаришига асослардан бири бўлди.

Жавоб тариқасида Россия болаларни ўғирламаганини, балки уларни хавфсизлигини таъминлаш учун эвакуация қилганини таъкидлаб келмоқда.