Умеров Брюсселда Путин ва Уиткофф учрашувини муҳокама қилди

Украина Миллий хавфсизлик ва мудофаа кенгаши котиби Рустем Умеров 3 декабр куни Брюсселда Европадаги етакчиларнинг хавфсизлик бўйича маслаҳатчилари билан учрашди. Бу ҳақда Украина президенти Володимир Зеленский Х ижтимоий тармоғида маълум қилди.

Зеленскийнинг тушунтиришича, Умеров Украина Қуролли кучлари Бош штаби раҳбари Андрей Гнатов билан бирга «Москвада АҚШ вакилларининг кечаги алоқаларидан сўнг маълум бўлган нарсалар ҳақида Европадаги ҳамкасбларини хабардор қилди, шунингдек зарур хавфсизлик архитектурасининг Европа қисмини муҳокама қилди».

Шундан кейин Украина вакиллари АҚШга жўнаб, у ерда АҚШ президентининг махсус вакили Стивен Уиткофф ва Трампнинг куёви Жаред Кушнер билан учрашади. Суҳбат мавзуси — Кремлнинг музокара позицияси ва урушни тугатишга оид Оқ уй режаси бўлади.

2 декабр куни Россия президенти Владимир Путин Украинадаги урушни тўхтатиш вариантларини муҳокама қилиш учун Москвада Стивен Уиткофф ва Жаред Кушнер билан учрашди.

Учрашув якунлари ҳақида Путин ёрдамчиси Юрий Ушаков маълумот берди. Унинг сўзларига кўра, томонлар келишувга эриша олмаган. У учрашув мазмунини ошкор қилишдан бош тортди, «бутунлай ёпиқ, махфий» суҳбат бўлганини айтди, аммо Владимир Путин Вашингтон таклиф қилган «ҳудудий масалаларга оид қатор таклифларга танқидий, ҳатто салбий муносабат билдирганини» қайд этди.

Ушаковнинг айтишича, АҚШ вакиллари Кремл позицияси ҳақида Трампга «шахсан» ҳисобот беради, шундан сўнг, эҳтимол, Москва билан кейинги муҳокамалар учун телефон орқали боғланишади. Уиткофф ва Кушнер билан учрашув арафасида Путин Европа Доналд Трамп таклиф қилган Украинадаги урушни тартибга солиш режасига Кремл учун «қабул қилиб бўлмайдиган» ўзгартишлар киритганини айтган эди.

Урушни тўхтатиш бўйича дастлабки режа 28 банддан иборат бўлиб, унга кўра Луханск ва Донецк вилоятлари, жумладан АҚШ томонидан ҳам, амалда (де-факто) Россия ҳудуди сифатида тан олиниши керак эди. Херсон ва Запорижжя вилоятлари эса фронтнинг амалдаги чизиғи бўйича тақсимланиши кўзда тутилган.

Бундан ташқари, Трамп режасига биноан, Украина Қуролли кучлари ҳозир Украина назорати остида бўлган Донецк вилояти қисмидаги қўшинларини ҳам олиб чиқиши лозим эди.

АҚШ ва Украина вакиллари ўртасидаги музокаралардан сўнг режага Киев ва Европа Иттифоқи мамлакатлари манфаатларини кўпроқ инобатга оладиган ўзгартишлар киритилди. «РБК-Украина» манбалари маълумот беришича, хусусан, украин томони Украина Қуролли кучларининг Донецк вилоятидан чиқиб кетиши «имконсиз» эканини қатъий таъкидлаган.