Европада Украинадаги урушни тўхтатишга қаратилган тинчлик музокараларида ўзгариш йўқлиги туфайли АҚШ президенти Доналд Трамп сабр-тоқатини йўқотиши мумкин, деган хавотир мавжуд. CNN телеканали чоршанба, 10 декабрга ўтар кечаси, исми ошкор этилмаган европалик амалдорларга таяниб хабар беришича, Трамп музокаралардан чиқиб кетиб, Москва билан тинчлик келишувига эришишга гўёки тўсқинлик қилаётганлик учун айбни Киев ва Европа пойтахтлари зиммасига юклаши мумкин.
Ўз навбатида, шунингдек номи ошкор этилмаган АҚШнинг юқори лавозимдаги бир амалдори ҳам бу тахминга қўшилди ва телеканалга шундай деди: Оқ уй раҳбари учун «бу тугамас уруш» тобора каттароқ сиёсий юкка айланиб бормоқда.
Шу билан бирга, АҚШнинг НАТОдаги доимий вакили Мэттю Уитакер Fox News телеканали эфирида Трамп агар Москва ва Киев ўртасида тинчлик келишувини имзолашнинг иложи йўқ, деган хулосага келса, Украинадаги можаро бўйича келишувга эришиш саъй-ҳаракатларидан воз кечиши мумкинлигини айтди.
Бундай шароитда Wall Street Journal (WSJ) газетасининг Европадаги манбалари таъкидлашича, АҚШ, Украина ва Россияга тинчлик режаси асосий бандларидаги зиддиятларни бартараф этиш учун «ҳафталар ёки ойлар» керак бўлиши мумкин. Нашр суҳбатдошларидан бири Вашингтон Киев ва Европа Иттифоқи олдига бажариб бўлмайдиган вазифалар қўяётганини айтди.
«Америкаликларнинг тезкор натижа исташини биламиз. Бироқ муҳокама қилинаётган масалаларнинг мураккаблигини ҳисобга олган ҳолда, қандай қилиб қисқа фурсат ичида тез натижага эришиш мумкинлигини тасаввур қилиш қийин», — деди газета манбаси.
Ўз навбатида, Financial Times (FT) газетаси манбалари олдинроқ билдиришича, Доналд Трамп Украина президенти Володимир Зеленскийга АҚШнинг тинчлик режасига рози бўлиши учун АҚШ ва Украинада 25 декабр куни нишонланади Рождествогача муҳлат берган. Шу билан бирга, Киевдаги «РБК-Украина» агентлиги манбаси Трамп ҳақиқатан ҳам Зеленскийдан тезкор жавоб кутаётганини тасдиқлаган, бироқ унга аниқ муддат қўймаганини айтган.
АҚШнинг тинчлик режаси 28 банддан иборат эди, аммо Европа етакчилари ва Украина томони ўртасидаги маслаҳатлашувлардан сўнг қайта ишланиб, 20 банддан иборат ҳолатга келтирилди. Бу ҳақда Володимир Зеленский 8 декабр куни кечқурун, Лондондан Брюсселга учаётган самолёт бортида журналистларга маълум қилди.
