Киев Трампнинг тинчлик режаси бўйича АҚШга расмий жавоб йўллади

Украина чоршанба куни, 10 декабрда, Россия бошлаб берган урушни тўхтатишга қаратилган тинчлик режасининг сўнгги лойиҳаси бўйича АҚШ маъмуриятига батафсил жавоб юборди. Бу ҳақда Axios нашрига Украина ва АҚШ расмийлари маълумот берган. "РБК-Украина" агентлиги эса ушбу маълумотни хабардор манба орқали тасдиқлаган.

Axios’нинг маълум қилишича, Украина Миллий хавфсизлик ва мудофаа кенгаши котиби Рустем Умеров, АҚШ билан музокараларда Украина делегациясига раҳбарлик қилар экан, расмий жавобни — ундаги изоҳлар ва таклиф этилган таҳрирлар билан бирга — АҚШ президенти Доналд Трампнинг куёви ва маслаҳатчиси Жаред Кушнерга юборган.

Бир неча кун давомида асосан Буюк Британия, Франция ва Германия каби Европадаги иттифоқчилари билан маслаҳатлашувлар ўтказганидан сўнг, украиналик музокарачилар ҳудудлар тўғрисидаги масалалар ва Россия қўшинлари томонидан эгаллаб олинган Запорижжя АЭС мақоми юзасидан муаммоларни ҳал қилиш бўйича янги ғояларни баён этган.

Володимир Зеленский ўзининг ҳар кунги видеомурожаатида маълум қилишича, 20 банддан иборат тинчлик режаси асосида АҚШ билан ўзаро муносабатларга оид яна икки ҳужжат устида иш олиб борилмоқда: бири — АҚШ томонидан хавфсизлик кафолатлари ҳақида, иккинчиси эса Украина тикланиши ва қўшма инвестициялар ҳақида. Украина президентининг сўзларига кўра, 10 декабр куни "Украинани тиклаш ва иқтисодий юксалиши бўйича ҳужжат устида ишлайдиган гуруҳнинг биринчи амалий учрашуви бўлиб ўтди".

Америка томонидан ушбу учрашувда Жаред Кушнер, АҚШ молия вазири Скотт Бессент ҳамда дунёдаги энг йирик инвестиция компанияларидан бири — BlackRock раҳбари Ларри Финк иштирок этди.

Axios’нинг ёзишича, 11 декабр куни АҚШ ва Украинадан юқори мартабали ҳарбий амалдорлар АҚШнинг тинчлик режаси муҳокамасини давом эттириш мақсадида виртуал йиғилиш ўтказиши кутилмоқда.