Зеленский: Сайлов ўтказиш учун ўт очишни тўхтатиш талаб этилади

АҚШ президенти Доналд Трамп талаб қилаётган Украинадаги президентлик сайловлари ҳарбий ҳолат шароитида ҳам ўтказилиши мумкин, бироқ камида сайлов жараёни ва овоз бериш вақтида ўт очишни тўхтатиш шарти билан. Бу ҳақда Украина президенти Володимир Зеленский маълум қилди.

«Биз президент Трамп билан исталган форматда ишлашга тайёрмиз. Агар президент Трамп Украинадаги сайловлар ҳақида кўпроқ гапираётган бўлса — мен буни мутлақо очиқ айтаман — биз сайлов ўтказишга уриниб кўришимиз мумкин. Украина демократиядан қочяпти, деган гап йўқ», — деди Зеленский «кўнгиллилар коалицияси» йиғилишида. Ушбу учрашув пайшанба, 11 декабр куни видеоконференция форматида ўтказилган.

Унинг сўзларига кўра, сайлов ўтказиш учун хавфсизликни таъминлаш керак, бу борада эса «энг кўп ёрдам бериш имконияти Америкада».

«Агар сайлов ўтказиш зарур бўлса, ўт очишни камида сайловолди жараёни ва овоз бериш даври учун тўхтатиш керак. Ва мана шу ҳақида муҳокама юритиш зарур. Ростини айтсам, биз, Украинадагилар, Америка бу масалада Россия томони билан гаплашиши керак, деб ҳисоблаймиз», — деб қўшимча қилди Украина раҳбари.

Бундан олдин у хавфсизлик таъминланган тақдирда сайловларни яқин 60–90 кун ичида ўтказиш мумкинлигини айтган эди.

Доналд Трамп декабр бошида яна бир бор Украинада президентлик сайловлари бўлиши кераклигини айтди.

«Ҳа, деб ўйлайман, вақти келди. Менимча, ҳозир сайлов ўтказиш учун муҳим палла. Улар (ҳукумат) урушдан сайлов ўтказмаслик учун фойдаланмоқда, деб ўйлайман, лекин украин халқи шундай танловга эга бўлиши керак», — деди Трамп.

У, шунингдек, овоз бериш натижаси бўйича Зеленский яна ғолиб чиқиши мумкинлигини ҳам истисно қилмади.

Трамп феврал ойида ҳам Украинада сайлов ўтказишга чақирган эди. Ўшанда у Зеленскийни «сайловларсиз диктатор» деб атаган ва унинг рейтинги 4 фоиз, дея даъво қилган, лекин бу гапларига ҳеч қандай далил келтирмаган.

Украинада навбатдаги президентлик сайловлари 2024 йилда бўлиши керак эди, аммо мамлакатда Россиянинг тўлиқ миқёсдаги ҳужуми бошланганидан сўнг жорий этилган ҳарбий ҳолат туфайли сайловлар қолдирилди. Шу асосда Россия ҳокимияти бир неча бор Зеленскийни давлат раҳбари сифатида «нолегитим» деб аташга уринган.

Айни вақтда, Украина конституциясига кўра, ҳарбий ҳолат даврида Олий Рада (парламент) сайловлари ўтказилиши тақиқланган. Президентлик сайловлари эса алоҳида қонунлар билан тартибга солинади, бу қонунлар конституциядан фарқли ўлароқ, «формал-ҳуқуқий нуқтаи назардан» ўзгартирилиши мумкин.

Бундай ўзгариш киритиш учун парламент депутатларининг кўпчилик овози ва кейинчалик президент томонидан тегишли фармон чиқарилиши талаб этилади.