Қорақалпоғистонда 5 км чуқур қудуқдан саноат миқёсида газ чиқди

Қорақалпоғистон Республикаси Мўйноқ туманидаги 2-сон излов-қидирув қудуғидан катта босимли, саноат миқёсидаги табиий газ оқими олинди. Айни пайтда қудуқдан кунига 2,4 млн куб метр газ қазиб олинаётгани маълум қилинди.

Фото: Видеодан кадр

Маълумотларга кўра, ушбу қудуқ 90 кун мобайнида маҳаллий мутахассислар томонидан замонавий хориж ускуналарида бурғиланди. Қудуқнинг лойиҳавий чуқурлиги 5 минг метрни ташкил этади.

Қайд этилишича, бурғилаш ишлари “Ўзбекнефтгаз” АЖ таркибидаги “Ўзнефтгаз бурғилаш ишлари” МЧЖ мутахассислари иштирокида амалга оширилган.

Шунингдек, ҳудуддаги қолган истиқболли чуқур қудуқларда ҳам тун-у кун бурғилаш ишлари давом этмоқда. Мутахассислар йил якунига қадар ушбу қудуқлардан ҳам катта босимда табиий газ оқими олинишини кутмоқда.

Тайёрлаган: Отабек Матназаров

#газ #Қорақалпоғистон