Берлиндаги музокаралар: АҚШ Донбассни топширишни талаб қилмоқда

Берлинда 15 декабр, душанба куни бўлиб ўтган музокараларда АҚШ Россия билан тинчлик келишуви тузиш шарти сифатида Украина Россияга бутун Донбасс ҳудудини топшириши кераклиги ҳақидаги талабни яна илгари сурган. Бу ҳақда AFP агентлиги Германия пойтахтидаги маслаҳатлашувлар жараёнидан хабардор манбага таяниб хабар қилди. Унинг айтишича, РФ президенти Владимир Путин “ҳудудни олишни истайди”, Вашингтон эса Киевдан ортга чекинишни талаб қилмоқда. Бироқ Украина ўз назоратида қолиб келаётган Донецк ва Луханск вилоятларининг ҳудудларидан қўшинларни олиб чиқишдан бош тортмоқда. “Америкаликлар бу масалада Россия позициясини эгаллаётгани бироз ҳайратли”, — деди AFP суҳбатдоши.

АҚШдаги Урушни ўрганиш институти (ISW) маълумотига кўра, ҳозир Россия деярли бутун Луханск вилоятини ва Донецк вилоятининг тахминан 80 фоизини назорат қилади. РФ президенти ёрдамчиси Юрий Ушаков 12 декабр куни бутун Донбасс “эрта ёки кеч” Россия назоратида бўлишини — “агар музокара йўли билан бўлмаса, ҳарбий йўл билан” деган эди. Путин эса декабр бошида Ҳиндистоннинг India Today телеканалига берган интервюсида ўзини “Донецк халқ республикаси” ва “Луханск халқ республикаси” (“ДХР” ва “ЛХР”) деб эълон қилган тузилмалар “ҳар қандай ҳолда озод қилинади”, дея таҳдид қилган. “Ҳаммаси шунга келиб тақаляпти: ё биз қуролли йўл билан бу ҳудудларни озод қиламиз, ёки украин қўшинлари бу ҳудудларни тарк этади ва у ерда уришишни тўхтатади”, — дея Кремл раҳбари ултиматив тарзда баёнот берган.

Ўз навбатида Володимир Зеленский Украина президенти сифатида мамлакат ҳудудларини “тасарруф қилиш” ваколатига эга эмаслигини, бу масала референдумда ҳал қилиниши кераклигини таъкидлаган. Киев халқаро социология институти жорий йил сентябр охири — октябр бошида ўтказган сўров натижасига кўра, украинларнинг 71 фоизи Донбасни топширишга қарши.

Берлинда 15 декабр куни Украина ва АҚШ делегациялари ўртасида Россиянинг Украинага қарши урушини тўхтатиш режаси бўйича иккинчи раунд музокаралар якунланди. У Зеленский ҳамда АҚШ президентининг махсус вакиллари — Стивен Уиткофф ва Жаред Кушнер иштирокида ўтди.

Кечқурун Украина президентини Германия канцлери Фридрих Мерц қабул қилди. Учрашув якунлари бўйича Берлинда ўтказилган матбуот анжуманида Зеленский Киев ва Вашингтоннинг ҳудудлар масаласида ҳали “турлича позиция”да эканини билдирди. Унинг сўзларига кўра, Америка томони ўз талабларини қўйишдан кўра, кўпроқ Россия талабларини етказиб бермоқда.

Кейинроқ Зеленскийнинг бир қатор Европа етакчилари, жумладан Буюк Британия бош вазири Кир Стармер ва Франция президенти Эммануэл Макрон билан музокаралари режалаштирилганди.