Ўзбекистоннинг янги элчиси Рим папасига ишонч ёрлиқларини топширди

Ватиканнинг Ҳаворийлар саройида бўлиб ўтган маросимда Ўзбекистоннинг Испаниядаги элчиси Фаррух Турсунов Рим папаси Лев XIVга ишонч ёрлиқларини топширди.

Суҳбат чоғида элчи Ўзбекистонда сиёсий, иқтисодий ва ижтимоий соҳаларда амалга оширилаётган кенг кўламли ислоҳотлар, демократик институтларни мустаҳкамлашга қаратилган саъй-ҳаракатлар ҳақида маълумот берди. Шунингдек, Ўзбекистон президенти номидан Рим Папасига самимий салом ва энг эзгу тилакларни етказди.

Рим Папаси Лев XIV эса Ўзбекистон президенти ва халқига чуқур ҳурмат-эҳтиромини изҳор этди. У дипломатик муносабатлар ўрнатилганидан буён ўтган 33 йил давомида Ўзбекистон ва Ватикан ўртасида турли миллат ва дин вакиллари ўртасида дўстлик ҳамда ўзаро англашувни мустаҳкамлашга хизмат қилувчи ҳамкорлик салоҳияти шаклланганини таъкидлади.

Учрашувда Самарқанднинг Шарқ ва Ғарб дунёсига таъсир кўрсатган фалсафий ҳамда диний тафаккурнинг йирик маркази сифатидаги аҳамиятига ҳам алоҳида эътибор қаратилди. Томонлар Ўзбекистоннинг динлараро тотувлик ва бағрикенглик тамойилларини илгари суриш тарафдори экани, бу борадаги халқаро ташаббусларни қўллаб-қувватлаб келаётганини таъкидлади.

Учрашув якунида Рим папаси Лев XIV ўзбек халқининг гуллаб-яшнаши учун ибодат қилишини билдириб, Ўзбекистон ва Ватикан ўртасидаги дўстлик ва конструктив ҳамкорлик янада мустаҳкамланишини тилади.

Маълумот учун: Фаррух Турсунов Ўзбекистоннинг Испаниядаги элчиси ҳисобланади. У 2024 йил 9 апрел куни Испания қироли Филипп VIга ишонч ёрлиқларини топширган. Шунингдек, у ўриндошлик асосида Ўзбекистоннинг Андоррадаги элчиси бўлиб, 2025 йил 11 март куни Андорра ҳамраиси — Франция президенти Эммануэл Макронга ишонч ёрлиқларини топширган.