Актриса Брижит Бардо вафот этди

Француз актрисаси Брижит Бардо вафот этди. У 91 ёшда эди.

Брижит Бардо 1934 йил 28 сентябрда Парижда туғилган. Ўсмирлик чоғларида балет билан шуғулланган, кейин эса фотомодел ва актрисага айланган. 14 ёшида унинг биринчи фотосессияси бўлиб ўтган ва 1949 йилда илк бор Elle журнали муқовасида чиққан. Шу билан бирга, у Олий миллий мусиқа ва рақс консерваториясида таҳсил олган.

Актриса 1952 йилда «Норманд туйнуги» комедияси орқали кинода дебют қилади ва бир йил ўтиб, «Манина, бикинидаги қиз» мелодрамасида бош ролни олади. 1952–1956 йиллар оралиғида Бардо 17 та филмда суратга тушди, аммо ҳақиқий юлдузлик онлари ўз турмуш ўртоғи Роже Вадим режиссёрлигида ишланган «Ва худо аёлни яратди» (Et Dieu… créa la femme, 1956) филмидаги бош рол орқали келади.

Кино оламидаги деярли йигирма йиллик фаолияти давомида Брижит Бардо 50 га яқин филмларда, жумладан, «Парижлик» (1957), «Ҳақиқат» (1960) ва «Нафрат» (1963) каби картиналарида суратга тушган, актриса сифатида Ален Делон, Марчелло Мастроянни ва Серж Генсбур каби машҳур актёрлар билан бирга рол ижро этган; Жан-Люк Годар ва бошқа кўплаб таниқли француз режиссёрлари билан ҳамкорлик қилган.

Актриса кинокарьерасини 1973 йилда, 39 ёшида якунлайди.

У мусиқа билан ҳам шуғулланган ва бир нечта пластинкалар ёздирган. Хусусан, Серж Генсбур билан дуэтда қўшиқ куйлаган.

Кинодаги фаолиятини якунлагач, Бардо жониворлар ҳимоячисига айланади. 1987 йилда у жониворларни ҳимоя қилиш бўйича «Брижит Бардо жамғармаси»га асос солади ва бунинг учун ким ошди савдосида уч миллион франк тўплайди – у ўзининг қимматбаҳо тақинчоқлари ҳамда мулкларини сотганди. Бундан ташқари, у ўз номидаги кўчмас мулкларни ҳам фонд ихтиёрига беради – Базошдаги уй ва Сен-Тропедаги дала ҳовлини, шунингдек, ўз китоби учун ҳуқуқни ҳам. Актрисанинг ўзи фонд «унинг ҳаётининг маъноси ва мақсади» экани ва «жониворлар унга одамлардан яқинроқлиги»ни такидлайди.