Қўшимча функционаллар
-
Тунги кўриниш
Сурхондарё вилоятининг яна икки туманига янги ҳоким тайинланди
Олтинсой тумани ҳокими Баҳром Маҳматрайимов Савдо-саноат палатаси раиси ўринбосари лавозимига ўтди, унинг ўрнига Отабек Мавлонов туманнинг янги ҳокимига айланди. Денов туманида эса ноябр ойида президент йиғилишида ишдан олинган Илҳом Аброров ўрнида Қумқўрғон тумани собиқ ҳокими Анвар Нормаматов иш бошлади.
Отабек Рустамович Мавлонов Сурхондарё вилоятининг Олтинсой тумани янги ҳокими этиб тайинланди.
Халқ депутатлари Олтинсой тумани кенгашининг вилоят ҳокими Улуғбек Қосимов иштирокида ўтган навбатдан ташқари сессиясида ташкилий масала кўриб чиқилди. Шу кунгача Олтинсой тумани ҳокими лавозимида фаолият юритиб келган Баҳром Маҳматрайимов бошқа ишга ўтиши муносабати билан лавозимидан озод этилгани маълум қилинди.
Вилоят раҳбари туман ҳокими лавозимига Миллий кадрлар захирасидан тавсия этилган Отабек Мавлонов номзодини таклиф этди. Мазкур номзод Халқ депутатлари туман кенгаши депутатлари томонидан маъқулланди.
Маълумот учун, Отабек Мавлонов 1980 йилда Термиз туманида туғилган. 2001 йилда Термиз давлат университетини молия йўналиши бўйича тамомлаган.
Меҳнат фаолияти давомида маҳаллий ҳокимликлар ҳамда Адлия вазирлиги ҳузуридаги Давлат хизматлари маркази тизимида турли лавозимларда фаолият юритган. Жумладан, Термиз тумани ҳокимининг ўринбосари, вилоят Инвестициялар ва ташқи савдо бошқармаси бошлиғининг ўринбосари лавозимларида ишлаган. Тайинловга қадар эса Сурхондарё вилояти Инвестициялар, саноат ва ташқи савдо бошқармаси бошлиғи биринчи ўринбосари лавозимида фаолият олиб борган.
Ўз навбатида, Олтинсой тумани собиқ ҳокими Баҳром Маҳматрайимов энди Ўзбекистон Савдо-саноат палатаси раиси ўринбосари лавозимида ишлайди.
Баҳром Маҳматрайимов 1974 йилда Сурхондарё вилояти Денов туманида туғилган. 2000 йилда Термиз давлат университетини, 2006 йилда Банк-молия академиясини тамомлаган. Иқтисодиёт фанлари бўйича фалсафа доктори.
У 1996–2021 йилларда Давлат солиқ қўмитаси, Молия вазирлиги, Ҳисоб палатасида турли лавозимларда фаолият юритган. 2021–2023 йилларда Кинематография агентлиги бош директорининг ўринбосари лавозимида ишлаган.
2023 йил январидан буён Олтинсой тумани ҳокими вазифасида ишлаб келган ишлаб келаётганди.
Шу куни халқ депутатлари Денов тумани кенгашининг ҳам навбатдан ташқари сессияси бўлиб ўтди.
Вилоят раҳбари Денов тумани ҳокими лавозимига Анвар Маматович Нормаматов номзодини таклиф этди. Мазкур номзод Халқ депутатлари туман кенгаши депутатлари томонидан маъқулланди.
Маълумот учун, Анвар Нормаматов 1981 йилда Ангор туманида туғилган. 2003 йилда Ўзбекистон Республикаси Ички ишлар вазирлиги академиясини ҳуқуқшунослик йўналиши бўйича тамомлаган.
Меҳнат фаолияти давомида Ички ишлар органларида турли масъул лавозимларда хизмат қилган. Жумладан, Сариосиё, Узун ва Қизириқ туманлари ҳамда Термиз шаҳар Ички ишлар бўлимларида бошлиқ, Сурхондарё вилояти Ички ишлар бошқармаси бошлиғининг жамоат тартибини сақлаш бўйича ўринбосари лавозимларида ишлаган. 2022 йил ёзидан буён Қумқўрғон тумани ҳокими лавозимида ишлаган.
Маълумот учун, Денов туманига 2023 йил январидан Илҳом Аброров раҳбарлик қилган, у жорий йил ноябрида президент раислигида ўтказилган видеоселектор йиғилишида у вазифасидан озод этилганди.
Шу тариқа, Сурхондарё вилоятида бир кунда тўрт туманда янги раҳбарлар иш бошлади: бунгача
Термиз тумани ҳокими Шуҳрат Назаров бошқа ишга ўтаётгани муносабати билан вазифасидан озод этилди ва унинг ўрнига Шуҳрат Қаландаров тайинлангани, шунингдек, Қумқўрғон туманида Анвар Нормаматов ўрнини Денов тумани прокурори Фаррух Холиқов эгаллагани хабар қилинганди.
