Зеленский ўз офиси раҳбари Будановни Миллий хавфсизлик кенгаши таркибига киритди

Украина президенти Володимир Зеленский Украина Миллий хавфсизлик ва мудофаа кенгаши (МХМК) таркибига президент офисининг янги раҳбари, 40 ёшли Кирилл Будановни киритди. Бу ҳақда Украина президенти сайтида душанба, 5 январ куни кечқурун эълон қилинган фармонда айтилади. Фармонда: “Украина Миллий хавфсизлик ва мудофаа кенгашининг шахсий таркибига Буданов Кирилл Алексеевич — Украина президенти офиси раҳбари киритилсин. Украина Миллий хавфсизлик ва мудофаа кенгаши таркибидан О.Ивашченко чиқарилсин”, — дейилади.

Зеленский 2 январ куни Украина Ташқи разведка хизматининг собиқ раҳбари генерал-лейтенант Олег Ивашченко мамлакат Мудофаа вазирлиги ҳузуридаги Бош разведка бошқармаси раҳбари этиб тайинланганини маълум қилган. Зеленскийнинг аввалги фармонидан келиб чиқишича, Ивашченко бошқалар қаторида Рустем Умеров раҳбарлигида Россиянинг Украинага қарши урушига барҳам бериш бўйича музокаралар гуруҳи таркибига ҳам киритилган эди.

Шу куни Мудофаа вазирлиги ҳузуридаги ГУРнинг собиқ раҳбари Кирилл Буданов давлат раҳбарининг Украина президенти офисини бошқариш таклифини қабул қилган. Бундан олдин президент офиси раҳбари лавозимини Андрий Ермак тарк этган эди: “Энергоатом” давлат корхонаси атрофидаги коррупция можароси фонида у истеъфога чиққан. Хабарда айтилишича, ўтказилган тинтувлардан кейин у истеъфо тўғрисида ариза ёзган.

5 январ куни чиқарилган бошқа фармонларида Владимир Зеленский Украина Хавфсизлик хизмати раҳбарининг биринчи ўринбосари этиб Сергей Андрушченко ўрнига Александр Покладни тайинлади. Поклад 2023 йил августидан бери СБУ раисининг ўринбосари лавозимида ишлаб келган, ундан олдин эса хизматнинг контрразведка департаментини бошқарган. Андрушченко 2021 йил июлидан бери СБУ раҳбарининг биринчи ўринбосари бўлган ва бир вақтнинг ўзида СБУ ҳузуридаги Антитеррор марказига ҳам раҳбарлик қилган.

Бундан ташқари, Зеленский СБУ раиси ўринбосарлари этиб, аввал СБУнинг контрразведка департаментини бошқарган Андрей Тупиковни ва илгари СБУнинг “А” махсус операциялар маркази раҳбарининг биринчи ўринбосари бўлиб ишлаган Денис Килимникни тайинлади. Шу билан бирга Украина президенти СБУ раиси ўринбосари Сергей Наумюкни ҳамда СБУнинг ҳарбий контрразведка департаменти бошлиғи Александр Дубровинни лавозимидан озод қилди.

Шу куннинг ўзида Зеленский генерал-майор Евгений Хмарага Украина Хавфсизлик хизмати раҳбари вазифасини вақтинча бажаришни топширган. Бир неча соат олдин СБУ сайтида Василий Малюкнинг хизмат раҳбари лавозимини тарк этиши ҳақидаги баёноти эълон қилинган эди. “СБУ раҳбари лавозимидан кетяпман. СБУ тизимида қоламан — дунё даражасидаги асимметрик махсус операцияларни амалга ошириш учун, улар келгусида ҳам душманга энг катта зарар етказади”, — деган Малюк.