Испаниянинг оммабоп El Mundo нашрида Talgo’нинг Ўзбекистондаги тезюрар поездлар паркига техник хизмат кўрсатиш бўйича энг йирик битими ҳақида мақола эълон қилингани маълум қилинди.
Маълумотларга кўра, шартнома 15 йилдан ортиқ давом этган ҳамкорлик натижасида имзоланган ва Talgo’нинг Ўзбекистонда техник хизмат кўрсатиш йўналишидаги энг йирик келишуви сифатида қайд этилмоқда.
Talgo’нинг Ўзбекистондаги фаолияти 2009 йилда бошланган: ўшанда 2 та тўққиз вагонли Talgo 250 харид қилинган ва улар 2011 йилда хизматга киритилган.
Кейин 2011 йилда қўшимча 2 та ўн бир вагонли таркиб бўйича шартнома имзоланиб, улар 2017 йилдан эксплуатация қилинмоқда.
2019 йилда парк яна 2 та ўн бир вагонли поезд ва 4 та қўшимча вагон билан кенгайтирилган, натижада дастлабки поездлар ҳам 11 вагонли қилиб тўлдирилиб, 2021 йилда ҳаракатлана бошлаган.
Talgo 250 поездларининг максимал тижорий тезлиги соатига 230 км, лойиҳавий тезлиги эса 275 км/соат экани қайд этилган.
Шунингдек, нашрда поездлар кузовнинг табиий оғиш (tilting) технологияси билан жиҳозлангани, Ўзбекистонда эса улар 1520 мм кенгликдаги рельс стандартида ҳаракатланиши сабабли айрим европача схемалардаги каби ғилдирак жуфтликларини ўзгартириш талаб этилмаслиги таъкидланган.
