Россия думаси депутатлари тинчликни муҳокама қилиш учун АҚШга таклиф этилди

РФ Давлат думасининг тўрт нафар депутатига Вашингтонда АҚШ Конгресси аъзолари билан учрашув учун расмий таклифнома юборилди. Унда, жумладан, Россиянинг Украинага қарши урушига барҳам бериш бўйича музокаралар жараёнини муҳокама қилиш режалаштирилган. Бу ҳақда 8 январ, пайшанба куни Флорида штати 13-округидан сайланган конгрессвумен Анна Паулина Луна маълум қилди. Лунага кўра, учрашувни АҚШ Давлат департаменти маъқуллаган ва у январ ойидаёқ бўлиб ўтиши мумкин. Луна бу ҳақда X ижтимоий тармоғида ёзган.

Луна қайси аниқ депутатлар ҳақида гап кетaётганини аниқ айтмади. Учрашувни ташкил этишда кўмак бергани учун конгрессвумен АҚШ давлат котиби Марко Рубиога шахсан миннатдорчилик билдирди.

Кейинроқ РФ Давлат думасининг халқаро ишлар қўмитаси раиси биринчи ўринбосари Алексей Чепа “Дождь” телеканалига берган изоҳида учрашувга тайёргарлик кўрилаётганини тасдиқлади. Унинг айтишича, учрашув “якуний келишувларга эришилган заҳоти” бўлиб ўтиши мумкин.

У Россия депутатларининг АҚШ Конгресси аъзолари билан музокараларида “долзарб масалалар”, жумладан иқтисод, терроризм ва хавфсизлик мавзулари муҳокама қилиниши кутилмоқда, деди. Учрашувга ким таклиф қилингани ҳақидаги саволни эса депутат Давлат думаси раҳбариятига йўналтириб, ўзи кимлар ҳақида гап кетаётганини билмаслигини айтди.

Россия президенти Владимир Путиннинг махсус вакили ва Россия тўғридан тўғри инвестициялар жамғармаси (РТИЖ) раҳбари Кирилл Дмитриев Россия ва АҚШнинг қонун чиқарувчи органлари вакиллари ўртасида учрашув бўлиши мумкинлигини 2025 йил октябр охирида, АҚШга ташриф буюрган пайтидаёқ маълум қилган эди.

Ўшанда РТИЖ раҳбари Анна Паулина Лунани “Россия ва АҚШ ўртасида мулоқот тарафдори сифатида” “тинч ечимлар”ни излаш ва “мамлакатлар ўртасидаги иқтисодий алоқаларни ривожлантириш” тарафдори бўлган Конгресс вакилаларидан бири, деб атаган.