Антикоррупция агентлиги коррупция хавфларини автоматик мониторинг қилади

Коррупцияга қарши курашиш агентлиги директори Акмал Бурҳоновнинг ЎзАга маълум қилишича, Агентлик ҳузурида ташкил этилаётган «Хавф-таҳлил маркази»га вазирлик ва идораларнинг 30 га яқин маълумот базалари интеграция қилинади.

Унинг айтишича, мазкур марказ фаолиятига сунъий интеллект технологиялари жорий этилиши режалаштирилган бўлиб, бу коррупциявий хавф-хатарларни аниқлаш ва назорат қилиш имкониятларини сезиларли даражада кенгайтиради. Жумладан, солиқ.уз базаси орқали ташкилот таъсисчилари билан давлат харидларида аффилланганлик ҳолатлари таҳлил қилинади.

Шунингдек, «Электрон жиноий-ҳуқуқий статистикаси» тизими орқали коррупцияга оид жиноятлар, уларнинг сабаблари ва тенденциялари бўйича маълумотлар ўрганилади. My.mehnat.uz базаси маълумотлари орқали эса яқин қариндошларнинг бевосита бўйсунув асосида ишлаши ҳолатларини аниқлаш имкони яратилади.

Қайд этилишича, бундай хавф-хатарларни анъанавий усулда таҳлил қилиш 5–6 кун вақт олган бўлса, рақамлаштириш ва интеграция натижасида мазкур жараённи бир соат ичида амалга ошириш мумкин бўлади.