Чехия бош вазири: ЕИ Путин билан музокара олиб бориши керак эди

Чехия бош вазири Андрей Бабиш Европа мамлакатлари раҳбариятини Россия президенти Владимир Путин билан тўғридан тўғри мулоқот олиб боришни истамаганликда танқид қилди. Венгриянинг Mandiner нашрига якшанба, 18 январ куни берган интервюсида сиёсатчи бундай алоқалар учун энди кеч бўлиб қолган бўлиши мумкинлигидан хавотир билдирди.

Бабишнинг айтишича, Украинада уруш бошланганидан бери Европа етакчилари Москва билан тўғридан тўғри музокаралардан қочиб келган, бундай мулоқотни қўллаб-қувватлаб келган Венгрия бош вазири Виктор Орбан эса танқидга учраган. “Энди, ниҳоят, Европага ҳам Путин билан тўғридан тўғри музокара олиб бориш кераклиги ҳақида тобора кўпроқ гапирила бошланди. Савол фақат шунда: бунинг учун жуда кеч бўлиб қолмадимикан”, — деди Чехия бош вазири.

Шу билан бирга, у вазиятни тинч йўл билан ҳал этиш имконияти АҚШ президенти Доналд Трамп иштирокисиз деярли йўқ, деган фикрни билдирди.

Politico нашри 14 январ куни хабар беришича, айрим Европа мамлакатлари ҳукуматлари ЕИ институтларига босим ўтказиб, Украинадаги урушни тартибга солиш бўйича музокараларда Евроиттифоқ манфаатларини ифодалайдиган алоҳида музокарачини тайинлашни талаб қилмоқда. Европада АҚШ Россия билан Европа иттифоқчиларидан четлашиб келишувга эришишидан хавотир бор.

Бу режани қўллаб-қувватловчилар орасида, жумладан, Франция ва Италия ҳам бор. Франция президенти Эммануэл Макрон ва Италия бош вазири Жоржа Мелони сўнгги ҳафталарда Россия президенти ва унинг атрофидаги доиралар билан дипломатик алоқа каналларини очишга чақирган.

Айни пайтда Буюк Британия бу таклифни рад этмоқда. Британия ташқи ишлар вазири Иветт Купер Politico’га 15 январ куни берган интервюсида, Украина иттифоқчилари урушни тўхтатиш учун Путин билан гаплашиш ўрнига, Россияга нисбатан санкциялар орқали иқтисодий босимни ҳам, Украинага ҳарбий ёрдамни ҳам кучайтириши лозимлигини айтган.