DW нашрининг фармонга таяниб хабар беришича, қарор Сербиянинг Бачка-Паланка шаҳрида рўйхатдан ўтган Tarkett компаниясига тегишли «Таркетт» акциядорлик жамияти акцияларини ҳам қамраб олади.
Фармон билан бошқа хорижий компанияларнинг Россиядаги активларига ҳам вақтинча бошқарув жорий этилган. Улар орасида «Каппа Рус»нинг 12 565 та акцияси, шунингдек, «Онтэкс РУ», «Эвиосис Пэкэджинг Кубань» ва «Менсен Пакажинг СНГ» компанияларининг 100 фоизлик улушлари бор.
Tarkett тураржойлар, савдо, саноат ва спорт иншоотлари учун пол қопламалари ишлаб чиқаради. DW маълумотига кўра, компаниянинг 34 та заводи мавжуд бўлиб, уларнинг иккитаси Россияда жойлашган. Компания, шунингдек, эскирган пол қопламаларини қайта ишловчи саккизта корхонага эга.
Сентябрь ойида Nestle, Metro, Auchan ва Leroy Merlin’нинг собиқ Россия бизнеси бўлган «Лемана Про» активлари ҳам вақтинча бошқарувга ўтказилган эди.
Reuters агентлиги Россия ҳукуматидаги манбаларига таяниб, 2022 йилда Украинага кенг кўламли ҳужум бошланганидан кейин ҳам Россияда ишлашда давом этган йирик Ғарб компаниялари активларига қаратилган чораларни санкцияларга жавоб кампанияси сифатида таърифлаган.
Агентлик суҳбатдошлари UniCredit ва Raiffeisen банкларининг Россиядаги бўлинмаларига ҳам вақтинча ташқи бошқарув жорий этилиши мумкинлигини истисно қилмаган. Бироқ бу ҳақда қарор қабул қилингани хабар қилинмаган.
