Ўзбекистонликлар Жанубий Кореяга визани қандай олишлари мумкин?
|19:16 / 03.02.202617 81514 мин
Ўзбекистон фуқаролари Жанубий Кореяга бориш учун сафар мақсади ва муддатидан қатъи назар — ҳар қандай ҳолатда виза олишлари шарт. Ҳужжатларни фақат аккредитациядан ўтган агентликлар орқали топшириш мумкин, консуллик талаблари эса қатъийлигича қолмоқда.
Фото: REUTERSФото: REUTERS
Айни пайтда Кореяда миграция қоидаларини бузган Ўзбекистон фуқаролари сони ортгани сабабли виза беришда эҳтимолий чекловлар жорий этилиши ҳақидаги баёнотлар алоҳида эътиборни тортмоқда. Ҳозирча қоидалар ўзгармаган, шунинг учун визани расмийлаштириш тартиби қандайлиги ва ҳозир амалда бўлган талабларни билиш зарур.
Қуйида Ўзбекистон фуқаролари учун Корея визасини расмийлаштириш бўйича амалдаги қоидалар жамланган: мавжуд виза тоифалари, ҳужжатларга қўйиладиган талаблар, ариза топшириш тартиби ва рад этишнинг асосий сабаблари.
Кореяга визани ким ва қачон олиши керак
Ўзбекистон фуқаролари Жанубий Кореяга ҳар қандай сафар учун: туризм, ўқиш, ишлаш ёки қариндошларни зиёрат қилиш мақсадидан қатъи назар виза олишлари шарт. Визасиз ҳатто бир кунга ҳам кириш мумкин эмас.
Европа, АҚШ ва айрим МДҲ давлатлари фуқаролари фойдаланадиган K-ETA электрон рухсатномаси Ўзбекистон фуқаролари учун амал қилмайди. Барча аризалар анкета ва ҳужжатлар тўплами билан офлайн тарзда топширилади. Туристик ва меҳмон визалари учун ҳужжатларни қабул қилиш фақат аккредитациядан ўтган агентликлар орқали амалга оширилади.
Кореяга виза турлари
Ўзбекистон фуқаролари учун энг кўп расмийлаштириладиган олти хил виза мавжуд. Улар сафар мақсади, Кореяда бўлиш муддати ва ҳужжатларга қўйиладиган талабларга кўра бир-биридан фарқ қилади.
C-3 — қисқа муддатли виза (90 кунгача)
Туризм, меҳмон сифатида бориш ва хизмат сафари учун фойдаланилади. Сафар мақсадига қараб меҳмонхона брони, таклифнома ёки компаниядан хат талаб қилинади. Ўзбекистонда фақат аккредитациядан ўтган агентликлар орқали топширилади.
C-4 — қисқа муддатли меҳнат визаси
Кореяга қисқа муддатли ишларни бажариш учун таклиф этилган мутахассисларга берилади. Иш берувчи билан тузилган шартнома ва ҳужжатлар талаб қилинади. Муддати — 90 кунгача.
D-2, D-4 — таълим визалари
D-2 — университет талабалари учун, D-4 — тил курслари учун.
Ўқишга қабул қилинганлик ҳақидаги хат, ўқиш учун тўлов амалга оширилганини тасдиқловчи ҳужжат ва молиявий имкониятни кўрсатувчи маълумотлар талаб этилади.
E-9 — давлат дастури (EPS) бўйича меҳнат визаси
Мавзуга оид
Ташқи меҳнат миграцияси агентлиги орқали берилади. Танлов ва квоталашдан ўтгандан сўнг расмийлаштирилади. Консулликка мустақил равишда мурожаат қилиш кўзда тутилмаган.
E-7 — малакали мутахассислар учун
Мутахассислик бўйича маълумот, тасдиқланган иш тажрибаси ва Корея иш берувчиси билан шартнома талаб қилинади. Виза Корея Республикасининг миграция органлари олдиндан маъқуллаганидан сўнг расмийлаштирилади.
H-2 — этник корейслар учун
Корея миллатига мансублик ҳужжатлар билан тасдиқланганда берилади. 4 йилу 10 ойгача ишлаш ва яшаш ҳуқуқини беради. Топширишдан олдин танловдан ўтиш, жумладан тил имтиҳони ва суҳбат талаб қилинади. Виза фақат миллатга қараб автоматик равишда берилмайди.
Шунингдек, F-4 визаси ҳам мавжуд — расман «чет элдаги ватандош» мақомини олган шахслар учун. Бу алоҳида тоифа бўлиб, чекланган миқдордаги аризачилар олиши мумкин. Ўзбекистон фуқароларининг аксарияти учун асосий вариант сифатида H-2 визаси қолмоқда.
Жанубий Корея визалари турлари
Сафар мақсади ва муддати бўйича асосий визаларнинг таққосланиши.
Визаларнинг аксарият турлари учун — биринчи навбатда туристик ва меҳмон визалари учун шахсан ариза топшириш назарда тутилмаган. Ҳужжатлар фақат элчихонанинг консуллик бўлими билан ҳамкорлик қиладиган аккредитациядан ўтган туристик агентликлар орқали қабул қилинади. Уларнинг номлари элчихонанинг расмий сайтида эълон қилинади ва фақатгина улар фуқаролардан аризаларни қабул қилиб, кўриб чиқиш учун топшириш ҳуқуқига эга.
Тўғридан-тўғри элчихона орқали расмий меҳнат шартномалари асосида бериладиган визалар, айрим тоифадаги талабалик визалари ҳамда давлат дастурлари доирасидаги визалар расмийлаштирилади.
Иш вақти ва аккредитациядан ўтган агентликлар рўйхати элчихона расмий сайтида эълон қилинади.
Виза учун қандай ҳужжатлар керак
Жанубий Корея визаси учун ҳужжатларнинг асосий тўплами барча аризачилар учун деярли бир хил, аммо якуний рўйхат сафар мақсадига боғлиқ.
Ҳужжатларнинг асосий тўплами:
Хорижга чиқиш паспорти
Сафар вақтида амал қилиш муддати камида 6 ой бўлиши керак. Паспортнинг асл нусхаси ва шахсий маълумотлар кўрсатилган биринчи саҳифасининг нусхаси топширилади.
Виза анкетаcи
Инглиз ёки корейс тилида, қўлда ёки чоп этилган ҳолда тўлдирилади. Имзо қўйилиши шарт. Анкета шаклини элчихона сайтидан юклаб олиш ёки аккредитациядан ўтган турфирмадан олиш мумкин.
Виза анкетаси намунаси.
Барча шаклларни фақат расмий сайтлардан юклаб олиш тавсия этилади. Эски намунадаги анкеталар (масалан, 2020 йилгача бўлган) қабул қилинмаслиги мумкин. Айрим агентликлар рус тилидаги ўз шаблонларидан фойдаланади, бироқ оригинал бланкалардан фойдаланган маъқул.
Фотография
Рангли, 3,5 × 4,5 см ўлчамда, оқ фонда, бош кийим ва кўзойнаксиз. Икки дона.
Сафар мақсадини тасдиқловчи ҳужжатлар:
— туризм: авиачипталар ва меҳмонхона бронлари, туроператор билан шартнома;
— меҳмонга бориш: расмий таклифнома, таклиф қилувчининг ID нусхаси, қариндошликни тасдиқловчи ҳужжат (зарур бўлганда);
— ўқиш: қабул қилинганлиги ҳақида хат, тўловни тасдиқловчи ҳужжат, маълумоти ҳақидаги ҳужжатлар;
— ишлаш: меҳнат шартномаси, Корея томонидан хат ёки ишлашга рухсатнома.
Таклифномалар, ҳомийлик хатлари ва таълим визалари (масалан, D-2 ёки D-4) учун ҳужжатларни одатда қабул қилувчи томон — университет, иш берувчи ёки Кореядаги қариндош тайёрлайди.
Молиявий ҳужжатлар
Шахсий ҳисоб рақамдан сўнгги 3 ойга оид маълумотнома, иш жойидан даромади ҳақидаги маълумотнома, ойлик маош ҳақида маълумотнома. Агар сафарни қариндош молиялаштирадиган бўлса, ҳомийлик хати, унинг молиявий ҳужжатлари ва қариндошликни тасдиқловчи ҳужжат илова қилиниши керак.
Ҳатто турфирма орқали ариза топширилганда ҳам, ҳужжатларнинг ҳақиқийлиги учун жавобгарлик ариза берувчида бўлади. Тўлиқ бўлмаган ҳужжатлар ёки анкетадаги хатолар — рад этишнинг энг кўп учрайдиган сабаблари.
Молиявий талаблар
Консуллик ариза берувчининг молиявий ҳолатини — сафар харажатини қоплаш ва яшаш жойига қайтиб келиш салоҳиятини текширади. Бу туристик, таълим ва меҳмон визалари учун аризаларни кўриб чиқишдаги асосий шартлардир.
Банк маълумотномаси
Виза учун банк ҳисоб рақамидан сўнгги уч ой ичидаги ҳаракатлар ва ҳисобдаги қолдиқни кўрсатувчи маълумотнома талаб қилинади. Ҳужжат инглиз ёки корейс тилида бўлиши, ариза берувчининг исми, банк муҳри ва имзосини ўз ичига олиши керак.
Туристик виза учун минимал сумма — 1500 дан 2000 АҚШ долларигача.
Қаерда расмийлаштирилади:
Энг мақбул вариант — маълумотномани банк бўлимида олиш. Бу ҳолда ҳужжат расмий бланкда, муҳр ва имзо билан расмийлаштирилади, бу консуллик талабларига мос келади.
Айрим банклар маълумотномани мобил илова орқали тайёрлаш имконини беради. Аммо электрон имзо ёки QR-код мавжуд бўлмаса, бундай маълумотномани банк бўлимида тасдиқлатиб олиш тавсия қилинади.
Ариза берувчининг молиявий ҳолатини тасдиқловчи банк маълумотномаси намунаси.
Виза хизматлари фақат расмий банк ҳужжатларини қабул қилади. Ҳақиқийлиги тасдиқланмаган онлайн маълумотномалар ҳисобга олинмаслиги мумкин. Агар ҳисоб рақами ҳомий номига расмийлаштирилган бўлса (масалан, ота-она), ҳомийлик хати, ҳомийнинг молиявий ҳужжатлари ва қариндошли алоқаларини тасдиқловчи ҳужжатни тақдим қилиш керак.
Таълим визалари (D-2 ва D-4) учун молиявий салоҳият ариза берувчи номига KDB Bank Uzbekistan томонидан берилган ва консуллик талабларига мувофиқ сумма ва маблағларнинг сақланиш муддати кўрсатилган маълумотнома билан тасдиқланади.
Иш жойидан маълумотнома
Ҳужжат ариза берувчининг ишлашини, даромад даражаси ва ишлаш давомийлигини тасдиқлайди. Сафар даврида иш ўрни сақланиши кўрсатилиши қўшимча афзаллик ҳисобланади.
Жанубий Кореяга виза олиш учун иш жойидан маълумотнома намунаси.
Ҳомийлик хати
Агар ариза берувчи ишламаса ёки таълим олаётган бўлса, сафарни қариндош молиялаштириши мумкин. Бу ҳолда инглиз тилида ҳомийлик хати, ҳомийнинг ҳисоб рақамидан маълумотнома, паспорти нусхаси ва қариндошликни тасдиқловчи ҳужжатлар тақдим қилинади.
Молиявий ҳужжатлар консулликка миграцион хатарни баҳолаш ва ариза берувчининг сафар учун маблағи борлигини ҳамда яшаш жойига қайтиш учун асосга эга эканлигини тасдиқлаш имконини беради.
Ариза бериш жараёни
Жанубий Кореяга виза аризасини топшириш жараёни бир неча босқичдан иборат. Ўзбекистон фуқаролари учун бу қуйидагича кечади:
1. Ҳужжат йиғиш
Биринчи босқичда ариза берувчи анкета, фото, паспорт, молиявий ҳужжатлар ва сафар мақсадини тасдиқловчи ҳужжатларни тўплайди. Аниқ рўйхат виза турига боғлиқ.
2. Ҳужжатларни агентликка топшириш
Одатда консуллик ҳужжатларни шахсан қабул қилмайди. Аксарият аризалар консуллик бўлимига ҳужжатларни топшириш ҳуқуқига эга аккредитациядан ўтган туристик агентликлар орқали юборилади.
3. Аризани рўйхатга олиш ва консулликка топшириш
Агентлик аризани тайёрлаб, ариза берувчини навбатга қўяди ва ҳужжатларни консулликка юборади. Шахсан иштирок бориш талаб қилинмайди, фақат айрим меҳнат ва таълим визаларида истиснолар мавжуд.
4. Қарорни кутиш
Ҳужжатлар топширилгандан сўнг қарорни кутиш босқичи бошланади. Ўртача кўриб чиқиш муддати — 7 дан 14 иш кунигача. Агентлик виза тайёр бўлганда хабар беради. Паспорт шу агентлик орқали олинади.
Ҳужжатлар топширилгандан кейин аризага ўзгариш киритиш мумкин эмас. Агар ҳужжатлар тўлиқ ёки ишончли бўлмаса, рад этиш эҳтимоли бор. Шу боис ҳужжат топширишдан олдин ҳамма нарсани тўғри йиғиш зарур.
Виза қанчада чиқади
Одатда, Кореяга виза ҳужжатлар топширилгандан сўнг 7–14 иш куни ичида чиқади. Амалда эса мавсум, виза тури ва консулликнинг бандлигига қараб муддат ўзгариши мумкин.
Кўриб чиқиш муддатига нималар таъсир қилади:
Виза тури
— Туристик ва меҳмон визалари (C‑3) тезроқ чиқади — 5-10 иш кунида.
— Таълим ва меҳнат визалари (D‑, E‑тоифалари): 15 иш кунигача.
Мавсум
Ёз ва куз — тиғиз мавсум, айниқса туристик визалар учун. Кўриб чиқиш муддати чўзилиши мумкин.
Текширув ва тўлдиришлар
Агар маълумотлар кам бўлса ёки шубҳа уйғотса, қўшимча маълумотномалар сўрашлари мумкин. Бу ўз-ўзидан муддатга яна камида 3-5 кун қўшади.
Ким орқали топширилиши
Аккредитациядан ўтган агентликлар ҳужжатларни тезроқ ва аниқроқ топширади. Анкетадаги хатолар ёки тўлиқ бўлмаган маълумотномалар жараён чўзилишига ёки рад этишга олиб келиши мумкин.
Виза фақат паспортда қайд этилганидан кейингина тайёр ҳисобланади. Паспортни фақат ўша топширилган фирма орқали қайтариб олиш мумкин.
Кореяга виза нархи қанча
Виза нархи унинг тури ва киришлар сонига боғлиқ. Ўзбекистон фуқаролари учун белгиланган консуллик йиғими АҚШ долларида тўланади ва аккредитациядан ўтган агентлик орқали консулликка берилади.
Консуллик йиғимлари
Консуллик йиғими миқдори виза тури ва консуллик қарорига кўра ўзгариши мумкин.
Виза рад этилганда тўлов қайтарилмайди.
Рад этилганда нима қилиш керак
Виза беришнинг рад этилиши қайта ариза топшириш тақиқланишини англатмайди. Корея консуллиги ариза берувчи хатоларни тузатган ёки ҳужжатлар тўпламини мустаҳкамлаган тақдирда қайта аризани қабул қилади.
Рад этилиш сабаби
Ҳужжатлар топширилган агентлик рад этиш сабаблари бўйича умумий изоҳ олиши мумкин. Одатда бу сафар мақсадини етарлича тасдиқламаслик, молиявий базанинг заифлиги ёки миграция хатари билан боғлиқ бўлади.
Қайси ҳужжатлар нотўғри тўлдирилиши мумкин
Рад этишлар кўпинча қуйидагилар билан боғлиқ:
— тўлдирилмаган ёки шубҳали банк маълумотномаси
— сафар мақсадининг ноаниқлиги
— анкетадаги хатолар
— сафар мақсади билан тақдим этилган ҳужжатларнинг мос келмаслиги.
Бу хатоларни қайта ариза топширганда тўғриласа бўлади.
Ҳужжатларни нима қилиш керак
Қайта ариза топширилганда қуйидагиларни қўшимча қилиш керак:
— Ўзбекистон билан алоқасини тасдиқлаш (иш ёки ўқиш жойидан маълумотнома, оиласи борлиги),
— сафар йўналишларини аниқ кўрсатиш
— қўшимча молиявий ҳужжатлар ёки янги таклифнома.
Қачон қайта ариза топшириш мумкин
Қайта ариза топшириш бўйича муддат чекланмаган. Амалда, агентликлар тахминан бир ой кутишни ва ҳужжатлар тўпламига ўзгаришлар киритишни тавсия қилади.
Агар ҳужжатлар қайтадан ҳеч қандай ўзгаришсиз топширилса, натижа ҳам шунга яраша бўлади. Янги ариза топширишдан олдин тўпламни агентлик билан бирга қайта кўриб чиққан маъқул.
Хулоса
Ўзбекистон фуқаролари учун Жанубий Кореяга сафар мақсадидан қатъи назар виза мажбурий.
Ўзбекистон фуқароларига K-ETA электрон рухсатномаси татбиқ этилмайди.
Аксарият визалар фақат аккредитациядан ўтган агентликлар орқали расмийлаштирилади.
Виза тури ва ҳужжатлар рўйхати сафар мақсадига боғлиқ.
Молиявий ҳужжатлар аризани кўриб чиқишда ҳал қилувчи омил ҳисобланади.
Рад этиш қайта топшириш имкониятини ёпмайди, аммо ҳужжатлар тўпламини қайта ишлашни талаб қилади.
