Трамп дориларга чегирмалар таклиф қилувчи сайтни ишга туширди

АҚШ президенти Доналд Трамп TrumpRx номли ҳукумат сайтини ишга туширганини эълон қилди. Унга кўра, америкаликлар дориларни янада қулайроқ нархларда сотиб олиши мумкин бўлади. Бу ҳақда dpa агентлиги жума куни, 6 февралда хабар берди.

Аниқлаштирилишича, дорилар сайтнинг ўзида тўғридан тўғри сотилмайди. Бироқ у ерда фойдаланувчилар рецепт билан бериладиган дориларни топиб, уларни сотиб олишда қанча тежаш мумкинлигини билиб олади. Дорини айнан шу нархда харид қилиш учун купонни юклаб олиб, уни ҳамкор дорихоналардан бирида кўрсатиш керак бўлади. Муқобил вариант сифатида портал керакли дорини ишлаб чиқарувчининг ўзидан тўғридан тўғри сотиб олиш имконияти борлигини ҳам кўрсатади.

Dpa маълумотларига кўра, сайт ишга тушган пайтда унда тахминан 40 та дори воситаси, жумладан вазн ташлаш учун препаратлар ҳам бўлган. Бироқ журналистлар истеъмолчилар Трамп ваъда қилаётгандай катта чегирмаларни ҳақиқатдан ҳам ола оладими-йўқми — бу борада ишонч билдирмаяпти. Шу билан бирга, АҚШдаги бир қатор йирик фармацевтика концернлари аллақачон TrumpRx орқали ўз маҳсулотларини чегирма билан таклиф қилишга розилик берган.

АҚШ дорилар сотиладиган бозорлар орасида энг қимматларидан бири ҳисобланади. Европа ва Осиё мамлакатларида эса бозор одатда қатъийроқ тартибга солинади ва энг юқори нархлар бўйича келишувлар мавжуд.

АҚШда яшаш нархи қимматлиги ҳақида баҳслар анчадан бери давом этмоқда. Дори-дармон нархлари — бу муаммонинг фақат бир жиҳати, холос. Шу фонда Трампни кўпинча ташқи сиёсат билан ҳаддан ташқари кўп шуғулланяпти, ички муаммоларга эса камроқ эътибор беряпти, деб танқид қилишади.