Centrum Air'нинг Урганч—Тошкент рейсига 12 йўловчи “сиғмай” қолди

Жорий йил 5 феврал куни соат 8:30 да Centrum Air’дан Урганч—Тошкент йўналишига чипта олган йўловчиларга рейс соат 9:10 га кўчирилгани ҳақида тунда хабар берилган. Рўйхатга олиш соат 8:25 гача амал қилиши билдирилган. Бироқ аэропортга 8:10 атрофида етиб келган айрим йўловчиларга “самолётда жой қолмагани” айтилган. Йўловчилардан бирининг таъкидлашича, рейсдан қолганлар орасида операцияга, давлат имтиҳонларига ёки халқаро уланма (трансфер) рейсларга кетаётган фуқаролар ҳам бўлган. У чиптани авиакомпаниянинг расмий сайти орқали харид қилганини айтади.

Kun.uz ҳолат юзасидан Centrum Air билан боғланди. Компания вакилининг маълум қилишича, парвоз куни мазкур рейсни амалга ошириши керак бўлган самолёт техник сабаблар билан кичикроғига (сиғими кам) алмаштирилган. Натижада айрим йўловчилар режалаштирилган рейс билан учиб кета олмаган.

Компания позициясига кўра, юзага келган вазиятда авиакомпания ўз зиммасига тушган барча мажбуриятларни бажарган. Хусусан, йўловчиларга зудлик билан муқобил парвоз вариантлари таклиф қилинган, чипталар йўналиш бўйича энг яқин рейсларга қайта расмийлаштирилган ва “сиғмай қолган” барча йўловчилар жой билан таъминланган. Компания келтирилган ноқулайликлар учун узр сўраганини ҳам билдирди.

Шунингдек, авиакомпания вакили компенсация сифатида ушбу ҳолатга дуч келган йўловчиларга кейинги парвозлар учун чегирмалар берилганини айтди. Қўшимча равишда айрим йўловчилар кўрган эҳтимолий молиявий ёки бошқа зарарлар ҳақидаги маълумотни фақат кейинроқ олганини, бу масала бўйича ҳозирча расмий мурожаат келиб тушмаганини билдирди.

Рейсдан қолган фуқароларнинг билетлари тахминан 15 соат кейинги, соат 23:30 даги рейсга кўчириб берилган. Бироқ айрим йўловчилар учун бу қарор операция, давлат имтиҳони ёки халқаро уланма рейс каби вақтга боғлиқ масалаларда етарли ечим бўла олмаган.

Аввалроқ Centrum Air самолётидаги техник носозлик туфайли 2025 йил 21 декабр куни учиши керак бўлган Қозон—Тошкент рейсининг 200 дан ортиқ йўловчилари 27 соат аэропортда қолиб кетганди.

2025 йил 26 сентябр куни айнан ушбу компания бир ўринга 2 та чипта сотиши натижасида икки фуқаро Истанбул аэропортида қолиб кетганди. Авиакомпания хатоси билан Истанбул—Наманган рейсига сиғмай қолган фуқароларга Рақобат қўмитаси аралашуви билан компенсация ундириб берилганди.