“Ташқи кўринишим билимимни белгилаб бермайди” – ЎзЖОКУда бўйинбоғсиз талабалар дарсга киритилмади

Ўзбекистон журналистика ва оммавий коммуникациялар университетида ўнлаб талабалар дарсга киритилмади. Бунга улар форма киймагани ва дарсга кеч қолгани “сабаб” бўлган. Университет талабаси Акмал Йўлдошевга кўра, ундан “дарс тайёрладингми, маърузаларга қатнашдингми, адабиётларни ўқидингми?” деб сўрашмаган, аксинча, “галстугинг қани, агар бўлмаса, бор, кетавер, бу ички қоида”, дейишган.

16 феврал куни Ўзбекистон журналистика ва оммавий коммуникациялар университетида бир гуруҳ талабалар форма киймагани ва кеч қолгани учун дарсга киритилмади. Ҳолат акс этган видео магистратура босқичи талабаси Акмал Йўлдошевнинг Facebook’даги саҳифасида эълон қилинди.

Видеода у билан суҳбатлашган яна бир талаба Баҳодирхон Элибоев бакалавр ва магистратура босқичида таҳсил олаётган қарийб 100 нафар талаба дарсга қўйилмаганини маълум қилган.

“Дарсга тайёрландингми, маърузаларга қатнашдингми, адабиётларни ўқидингми, деб ҳеч ким мендан сўрагани йўқ. Галстугинг қани, агар бўлмаса бор, кетавер, бу ички тартиб-қоида, ҳамма нарсадан устун дейишяпти”, деган Акмал Йўлдошев.

Шунингдек, у олий таълимда форма масаласига салбий қарашини билдирган.

“Менинг ташқи кўринишим билимимни белгилаб бермайди, маҳоратли журналистманми-йўқми, буларга ҳеч қандай алоқаси йўқ. Университет менга хизмат кўрсатади, бунинг учун орамизда шартнома тузилган: пул тўлаганман, менга маъруза ўқилиши керак, семинарга қатнашишим керак ва бу билим баҳоланиб, охирида диплом олишим керак. Шу икки муносабат бор. Ҳозир қандайдир ички тартиб-қоидани деб менинг истеъмолчи сифатидаги ҳуқуқларим, маънан талабалик ҳуқуқларим бузиляпти. Мен билим олгани келганман, галстугимни кўз-кўз қилгани эмас”, деган у.

Бундан ташқари, Акмал Йўлдошев бундай ҳолатлар талабанинг қўшимча маблағ тўлашига олиб келиши мумкинлигини билдирган.

“Бу тузини еб, тузлуғига тупуриш билан баробар”

Ўзбекистон журналистика ва оммавий коммуникациялар университети декани Оиша Закирова ҳолат юзасидан Facebook’даги ўз саҳифасида фикр билдирди.

“Душанба — янги ўқув ҳафтасининг бошланиши. Аммо афсуски, айрим талаба ва магистрантлар университет ички тартиб-қоидаларига нисбатан беписандлик билан муносабат билдирди. Университет бу шунчаки таълим муассасаси эмас. Бу — интеллектуал муҳит, тарбия мактаби, профессионал шахс шаклланадиган маскан. Ички тартиб-қоидалар эса муҳокама учун ўрнатилмайди, ижро учун қабул қилинади ва барча бунга бирдек амал қилади! Бу ҳар бир ташкилотнинг ўз имижини шакллантириш учун хизмат қилади! Оқ кўйлак ва галстук — академик маданият, поклик, интизом ва ҳурмат рамзи. Уни кийиб юришнинг нимаси ёмон?!” дея ёзган декан.

У декан сифатида университет имижи, академик муҳит ва тартиб учун шахсан жавобгар эканини қўшимча қилган.

“Шу боис ички тартиб-қоидаларга риоя қилиш масаласида ён бериш бўлмайди. Оддий интизом ва ички тартиб-қоида ислоҳотларнинг энг асосий шарти бўлиб хизмат қилади. Қолаверса, ўзи ўқиётган университетни мана шундай оммага олиб чиқиш, оддий элементар сўралган нарса учун унинг шаънига доғ тушириш тузини еб тузлуғига тупуриш билан баробар, шуни унутманг, ҳурматли талабалар!” деган Оиша Закирова.

Шунингдек, декан журналист ўзи ишлаётган ташкилот ички тартиб-қоидасидан ёки ўз шахсий хоҳиш истагидан келиб чиқиб кийиниш ҳуқуқига эга эканини, аммо университетда таҳсил олаётган ҳар бир талаба ички тартиб-қоидаларига амал қилиши лозимлигини, видеода кўринган барча талабалар дарсга формасиз келгани учун эмас, кеч қолиб келгани учун киритилмаганини маълум қилган.

Kun.uz ҳолат юзасидан Журналистика ва оммавий коммуникациялар университети ректори Шерзодхон Қудратхўжага сўров жўнатди.