Канаданинг Арктикадаги улкан оролларидан тортиб Жануби-Шарқий Осиёнинг тропик архипелагларигача — дунёдаги энг узун қирғоқ чизиқлари бир-биридан ҳайратланарли даражада фарқ қиладиган табиат манзаралари бўйлаб чўзилган.
Ушбу инфографикада қирғоқ чизиғи энг узун 20 давлатнинг рейтинги келтирилган. Унда географик хусусиятлар ҳар бир мамлакат қирғоқларининг узунлигини қандай белгилаши кўрсатилган. Маълумотлар WorldAtlas манбасидан олинган, Ҳиндистонга оид кўрсаткичлар эса мамлакат ҳукуматининг Ер ҳақидаги фанлар вазирлиги маълумотлари асосида янгиланган.
Канада қирғоқ чизиғининг беқиёс узунлиги кўп жиҳатдан унинг Арктикадаги географик хусусиятлари билан боғлиқ. Бу ердаги ўн минглаб ороллар, қўлтиқлар ва бўғозлар ниҳоятда эгри-бугри қирғоқ чизиғини ҳосил қилган.
Аслида мамлакат қирғоқ чизиғининг 70 фоиздан ортиғи Арктика ҳиссасига тўғри келади. Шу боис унинг шимолий ҳудудлари географияси рейтингдаги етакчилигини таъминловчи асосий омилдир. Норвегиянинг қирғоқ чизиғи қуруқлик ичкарисига чуқур кириб борувчи фьордлар ва қирғоққа яқин қарийб 239 100 та орол таъсирида шаклланган. Норвегия қирғоқ чизиғи 99 083 километрга чўзилган бўлиб, учинчи ўриндаги Индонезияникидан тахминан 70 фоиз узун.
Индонезиянинг қирғоқ чизиғи 17 500 дан ортиқ оролдан иборат архипелаг бўйлаб чўзилган. Айнан шу хусусият мамлакатнинг дунёда учинчи ўринни эгаллашига ёрдам беради.
Бошқа орол давлатлари ҳам юқори ўринларда қайд этилган. Жумладан, Филиппин 36 289 километр билан бешинчи, Япония эса 29 750 километр билан олтинчи ўринни эгаллаган. Австралия 25 761 километр билан еттинчи, Янги Зеландия эса 15 134 километр билан тўққизинчи ўринда турибди.
Бу мамлакатларни дунёдаги энг катта қуруқлик ҳудудига эга давлатлар билан таққослаш қизиқ фарқни кўрсатади. Майдони бўйича дунёдаги энг катта давлат — Россия 37 652 километр қирғоқ чизиғи билан тўртинчи, АҚШ эса 19 924 километр билан саккизинчи ўринда. Бу мамлакатнинг қуруқлик майдони ўз-ўзидан унинг қирғоқ чизиғи умумий узунлигини баҳолаш учун ишончли мезон бўла олмаслигини яққол кўрсатади.
Кучли ўнликни 14 499 километр қирғоқ чизиғига эга Хитой якунлайди. Ундан кейин 13 676 километр билан Греция ва 12 429 километр билан Буюк Британия келади. Ҳиндистон 2025 йилда қирғоқ чизиғининг расмий ўлчови қайта кўриб чиқилганидан сўнг 11 099 километр кўрсаткич билан 13-ўринни эгаллаган.
Қирғоқ чизиғининг узунлиги ўлчаш усулига қараб сезиларли даражада фарқ қилиши мумкин. Батафсилроқ ўлчовларда кичик қўлтиқлар, бухталар ва ороллар ҳам ҳисобга олинади. Бу эса кўпинча якуний кўрсаткичнинг каттароқ чиқишига олиб келади. Турли манбалардаги рейтинглар нега бир-биридан фарқ қилишини ҳам шу билан изоҳлаш мумкин.
