АҚШ ўзбекистонлик айрим шахсларга виза чекловлари жорий этди

АҚШ Давлат департаменти ноқонуний миграцияга кўмаклашган, деб топилган Ўзбекистон фуқароларига нисбатан виза чекловлари қўлланганини маълум қилди. Чекловлар, хусусан, туристик визаларни расмийлаштириш билан шуғулланган икки ўзбек компаниясининг раҳбарларига тааллуқли экани қайд этилган.

Фото: Alastair Pike/AFP/Getty Images

Маълумотда айтилишича, мазкур шахслар АҚШга ноқонуний кириш ниятида бўлган хорижликларга (сафар хизматлари орқали) атайин ёрдам кўрсатган. Компаниялар номлари очиқланмаган.

Шунингдек, текширувлар давомида ушбу тузилмалар вакиллари хорижликларни, жумладан вояга етмаганларни ҳам, Ўзбекистон аэропортлари ва чегаралари орқали Марказий Америкадаги транзит нуқталарига етказишни мувофиқлаштиргани ҳақида хулосалар келтирилган. Кейинчалик уларнинг кўпчилиги АҚШга ноқонуний киришга уриниш пайтида ушлангани айтилмоқда.

Бу қарор Ўзбекистон фуқароларига оммавий тарзда виза бериш тўхтатилди дегани эмас — чекловлар расмий баёнотларда айрим шахсларга нисбатан қўлланаётгани сифатида талқин қилинган.