24 февралга ўтар кечаси Москвадаги Савёловский вокзалида рўй берган портлаш оқибатида бир полициячи ҳалок бўлиб, яна икки нафари жароҳатланди.
ИИВ хабарига кўра, соат 00:05 атрофида Йўл-патрул хизматининг вокзал майдонида турган хизмат автомобили олдига бир киши келган ва номаълум қурилмани портлатган.
Дастлабки хабарларда «жиноятчи воқеа жойидан яширингани» айтилганди. Кейинроқ Тергов қўмитаси у воқеа жойида портлаш оқибатида ҳалок бўлганини маълум қилди.
Тергов қўмитаси ҳуқуқ-тартибот органи ходимининг ҳаётига тажовуз қилиш (РФ Жиноят кодекси 317-моддаси) ва портловчи қурилмаларнинг ноқонуний муомаласи (222.1-модда 1-қисми) бўйича жиноят иши қўзғатган.
ИИВ ҳалок бўлган полициячининг шахсини очиқлаган – бу полиция катта лейтенанти Денис Братушченко эди. Вазирлик у ва яраланган полициячиларнинг оилаларига ёрдам кўрсатилишини ваъда қилган.
Кейинроқ Тергов қўмитаси «ўзини портлатган» шахс – Удмуртияда яшовчи 22 ёшли шахс бўлиб, 22 феврал куни Петербургдан Москвага келганини хабар қилди. Идора унинг исмини очиқламаган.
Кучишлатар тузилмаларга яқин бўлган «112» ва Mash телеграм-каналлари ёзишича, вокзал атрофида портлаш уюштирган Сергей М. бўлиб, у Можга шаҳрида туғилган ва сўнгги вақтларда Петербургда пайвандчиликни ўрганиб, маҳаллий мебел фабрикасида ишлаган. У муқаддам жиноий жавобгарликка тортилмаган. «112» манбаси Сергей М. мунтазам равишда микромолия ташкилотларидан қарз олгани ва Resident Evil ўйинларига муккасидан кетгани ҳақида маълум қилган.
Тергов версияларидан бирига кўра, Сергей М. курьер бўлган ва Москвага олиб бориши буюртма қилинган жўнатмада нима борлигидан бехабар бўлган. «База»нинг ёзишича, уни манзилга Украина махсус хизмати ходимлари бўлган «буюртмачилар» телефон орқали йўналтириб турган.
Владимир Путин 24 феврал куни кечқурун ФХХ коллегиясида сўзлаган нутқида портлашни амалга оширган шахс катта эҳтимол билан интернет орқали ёлланганини айтди.
«Кеча Савёловский вокзалида бўлган иш, афтидан, бу албатта, сиз томонингиздан қўшимча ишларни талаб қилади, аммо ҳозирдан аниқки… катта эҳтимол билан, бугунги кунда одатий бўлган интернет орқали ёллаш бўлган. Бу одамга портловчи боғлашган, кейин эса масофадан уни ҳам, ҳужум объектини ҳам портлатишган. Катта эҳтимол билан у [ижрочи] ҳеч нарсани билмаган ҳам», – деган РФ президенти.
Кейинроқ ИИВ ташқи кузатув камераларидан монтаж қилинган кадрларни эълон қилди, унда Савёлевский вокзали майдонидаги портлаш пайти акс этган. Кадрларда портлашнинг эҳтимолий ижрочиси кўринмайди.
