ОАВ: Украина фронтда немис “мини-Таурус”ларини оммавий қўллаяпти

Украина Қуролли кучлари мамлакат шарқидаги фронтда немисларнинг Helsing компанияси ишлаб чиқарган HX-2 ҳужумкор дронларини оммавий қўллай бошлади. Бу ҳақда Украинанинг “Мілітарний” онлайн-нашри ва УНИАН агентлиги 2 март, душанба куни россияпараст “Разработчик БПЛА” Telegram-каналига таяниб хабар берди.

Ушбу канал немис дронлари Украина фронтининг “бир қатор йўналишларида қайд этилаётгани”ни ёзган. “Гуруҳ-гуруҳ бўлиб кириб келди, дарҳол турли участкаларга, — дейилади янги дронлар ҳақидаги маълумотда. — Нисбатан орқа ҳудудларда таъмирлаш бригадалари ва йўл тармоқларини ўрнатувчиларни уряпти”.

Telegram-канал HX-2 дронининг парчалари акс этган суратни ҳам чиқарган — улар россияликлар қўлига тушгани айтилган. Нашрда дрон “нишонга планерлаб киришни маъқул кўради, шунинг учун уни акустик жиҳатдан яхши эшитиб бўлмайди”, деб ёзилган. Муаллифлар HX-2 “қўшимча аниқлаш/нишонни қайта топиш” тизимига эга эканини ва “нишонга ҳужум пайтида видеоузатгични ўчириб қўйиши”ни қайд этган.

Бунинг олдин Украинада HX-2’дан оммавий жанговар фойдаланиш ҳақида хабар берилмаган эди. “Мілітарний” қайд этишича, сунъий интеллект (СИ) туфайли бу дрон “юқори автономликка” эга, бироқ бир нечта HX-2 “тўда” бўлиб бирлашиши ҳам мумкин. “HX-2’нинг эълон қилинган умумий оғирлиги уни бир неча килограммлик жанговар қисм билан жиҳозлаш мумкинлигини кўрсатади”, — деб ёзади портал.

2024 йил ноябрида немис таблоиди Bild Украинага Мюнхендаги Helsing стартапи ишлаб чиқарган HF-1 моделидаги 4000 та дрон етказиб берилиши ҳақида ёзган эди. Гап сунъий интеллект асосида ишлайдиган ҳужумкор дронлар ҳақида борган. ОАВ бу дронларни Киев Берлиндан етказиб берилишини кутиб келаётган TAURUS қанотли ракеталарига таққослаб “мини-Таурус”лар, деб атай бошлаган.

2025 йил февралда Bild Helsing Украинага яна 6000 та такомиллаштирилган HX-2 туридаги дронларни бериш ниятида эканини ёзган. Ишлаб чиқарувчи сайтида айтилишича, учиш масофаси 100 км бўлган бу модел сунъий интеллект туфайли “радиоэлектрон кураш воситаларига ва сигналларни бўғишга қарши тура олади”. 2024 йил декабрдаги пресс-релизда: “HX-2 Германияда ишлаб чиқарилади. Асосидаги дастурий таъминот ҳозир Украинада қўлланяпти”, — деб таъкидланган.