Украина қуролли кучлари инструкторлари Бундесверга Россиядан ҳимояланишни ўргатади

Украин ҳарбий инструкторлари Бундесверга Россиянинг эҳтимолий ҳужумини қайтаришга тайёргарлик кўришда ёрдам беради. Бу ҳақда Германия қуруқлик қўшинлари инспектори генерал-лейтенант Кристиан Фройдинг Reuters агентлигига берган ва 11 март, чоршанба куни эълон қилинган интервюсида маълум қилди. Фройдингнинг сўзларига кўра, дастлабки босқичда Украина қуролли кучларидан “икки хонали сон” миқдоридаги, яъни ўндан ортиқ инструктор Германиядаги ҳарбий билим юртларида “бир неча ҳафта” давомида ишлаш учун келади.

“Биз катта умид боғлаяпмиз, — деди Фройдинг. — Ҳозир Украина ҳарбийлари дунёда Россияга қарши фронтда ҳақиқий жанговар ҳаракатлар тажрибасига эга бўлган ягона ҳарбийлардир”. Генералнинг маълум қилишича, Украина қуролли кучлари ҳарбийлари немис ҳамкасблари билан артиллерия, бронетанк операциялари, учувчисиз аппаратлардан фойдаланиш ва муҳандислик ишлари каби соҳалардаги тажрибасини бўлишади.

Шу билан бирга, Германия қуруқлик қўшинлари инспектори ғарб разведка хизматлари баҳоларига таянди. Уларга кўра, Россия 2029 йилга бориб НАТОга қарши кенг кўламли ҳужумга тайёр бўлиши мумкин.

“Бу деярли эртага дегани. Бизнинг вақтимиз йўқ — душман биз тайёрлигимизни эълон қилишимизни кутиб турмайди. Шунинг учун тайёргарлик кўриш учун ҳар қандай имкониятдан фойдаланишимиз керак”, — деб таъкидлади Фройдинг.

Феврал ойида Der Spiegel журнали жанговар тажрибага эга украин инструкторлари Бундесвер ҳарбийларига дронлардан фойдаланиш, ҳужумларни қайтариш ва мобил иловалар ёрдамида операциялар ўтказишни ўргатиши ҳақида ёзган эди.

2022 йил октябридан буён тахминан 25 000 нафар украин ҳарбийси Германияда тайёргарликдан ўтди. Бу ҳақда dpa агентлиги Бундесвер вакилига таяниб хабар берди. Тайёргарлик Украин ҳарбийларини ўқитиш бўйича Европа Иттифоқи миссияси (EUMAM) доирасида амалга оширилмоқда. Бундесвер вакилининг сўзларига кўра, ҳозир Германия армияси Саксония-Анҳалт федерал еридаги ҳарбий полигонлардан бирида украин ҳарбийларига Leopard 1A5 асосий жанговар танкларини ва Biber зирҳли кўприк қўювчи техникаларини бошқаришни ўргатмоқда.

Бу Украина ва Германия ўртасидаги ҳарбий ҳамкорликнинг ягона йўналиши эмас. Масалан, декабр ойида украин дрон ишлаб чиқарувчиси Frontline Robotics ва Германиянинг мудофаа компанияси Quantum Systems Украина Мудофаа вазирлиги буюртмаси асосида жанговар дронлар ишлаб чиқаришни бошлаши маълум бўлган эди. Бу мақсадда Европадаги учувчисиз учиш аппаратларини ишлаб чиқариш бўйича биринчи тўлиқ автоматлаштирилган саноат линияси яратилади.