Сардор Озмуннинг Эрондаги мулкларини мусодара қилишмоқчи

Эрон ҳукумати эронлик футболчи Сардор Озмуннинг мулкларини мусодара қилишни режалаштирмоқда. Бу ҳақда Эрондаги Fars агентлиги хабар тарқатди.

Эроннинг Гулистон вилояти прокуратураси Теҳрон «душман» деб ҳисоблаган ташкилотлар ва давлатларни қўллашда гумонланаётган 16 кишининг «мулкларини аниқлаш ва мусодара қилиш жараёни»ни бошлаган. Fars ўз манбасига таяниб ёзишича, бундай шахслар рўйхатида эронлик ҳужумчи Сардор Озмуннинг ҳам номи бор.

Аввалроқ Озмун ўртоқлик учрашувлари учун йиғин ўтказаётган Эрон миллий жамоаси таркибидан четлатилгани хабар қилинганди. Бунга у ижтимоий тармоқдаги саҳифасида Дубай амири Муҳаммад ибн Рашид ол-Мақтум билан тушган суратини жойлаши сабаб бўлган – Теҳрондагилар буни «садоқатсизлик акти» ва БААни қўллаб-қувватлашга ишора деб баҳолаган.

Озмун футболчилик фаолиятини Эроннинг «Сипоҳон» клубидан бошлаган, кейинроқ Россиянинг «Рубин» ва «Зенит» клубларида ўйнаган. 2022 йилда уни Германиянинг «Байер» клуби трансфер қилган, у бир муддат Италиянинг «Рома» клубига ижарага берилган, 2024 йилда эса БААнинг «Шабоб Ал-Аҳли» клубига келиб қўшилганди ва ҳозир ҳам шу клуб сафида тўп сурмоқда.