23 сентябр куни Эрон президенти Масъуд Пизишкиён АҚШда – БМТ Бош Ассамблеяси олий даражадаги музокараларида нутқ сўзлади.
«АҚШ президенти бизни террорчилар деб атади. Аслида биз терроризм қурбони бўлганмиз», деди Эрон вакили БМТга юзланиб. Шундан сўнг у 28 феврал куни АҚШ ва Исроил ҳужум бошлаганда – ўз қароргоҳига қилинган зарба натижасида ҳалок бўлган мамлакатнинг марҳум олий раҳбари Оятуллоҳ Али Хоминаийнинг суратини кўрсатди.
Пизишкиён Минобдаги бошланғич мактаб ва Ламерддаги спорт мажмуасига қилинган ракета зарбаларида ҳалок бўлган 100 дан болаларнинг айримларининг суратларини ҳам тақдим этди. АҚШ Ламердга зарба берганини рад этади ва Минобда нима содир бўлганини ҳалигача ўрганаётганини айтиб келади.
«Бизнинг бегуноҳ халқимиз мамлакатимизга нисбатан уюштирилган қўрқоқларча ҳужумлар ва тажовузларнинг нишонига айланди. Ва биз ўзимизни бор кучимиз билан ҳимоя қилдик», – деди Пизишкиён.
Сешанба куни Бош Ассамблеядаги нутқида Трамп унинг олдида «катта қарор» турганини таъкидлади – ё эронликларга ўз мамлакатини қайта қуришга имкон берадиган келишув бўйича музокара олиб бориш, ёки «Ислом Республикасини йўқ қилиш ва буни тез амалга ошириш». Пизишкиён бу таҳдид «зўравонлик менталитетининг белгиси» эканини айтди.
«[Трамп] билиши керакки, санкциялар, ортиб бораётган босим ва зўравонликлар қаршисида Эрон халқининг қаршилиги фақат кучайиб боради. Биз ҳеч қачон бош эгмаймиз ёки тиз чўкмаймиз», – деди у.
У шундай қўшимча қилди: «Биз куч ишлатиш тилини қабул қилмаган ҳолда, мулоқот, дипломатия ва музокараларга тайёрмиз»
