2026 йил уч ойида «авариялар»нинг 31 фоизи ўлим билан якунлангани маълум бўлди

2026 йилнинг уч ойи давомида республикада 1102 та йўл-транспорт ҳодисаси қайд этилди. Уларнинг 31,4 фоизи (346 та) инсон ўлими билан якунланди. Бу ҳақда Ички ишлар вазирининг ўринбосари, Тергов департаменти бошлиғи Рамазон Ашропов матбуот анжуманида маълум қилди.

Маълум бўлишича, йўл-транспорт ҳодисаларининг 13,6 фоизи ҳайдовчилар томонидан пиёдага йўл бермаслик, 32,9 фоизи белгиланган тезликка риоя қилмаслик, 4,2 фоизи ҳайдовчини ухлаб қолиши ва 22,4 фоизи светофорнинг талабларига амал қилмаслик оқибатида содир бўлган.

Шунингдек, ахборот технологиялари орқали содир этилган жиноятлар сони 18 мингдан ошгани, уларнинг аксарияти фуқароларнинг пул маблағларини электрон тўлов тизимлари орқали ўзлаштириш билан боғлиқлиги таъкидланди.