DW хабарига кўра, Захариянинг кетиши ҳақида аввал The New York Times ва CNN хабар берган. Унинг ўзи ҳам 17 октябрга ўтар кечаси X ижтимоий тармоғидаги постида буни билвосита тасдиқлаган.
Захария Доналд Трампни илиқ сўзлар билан таърифлаб, «Унинг қўл остида ишлаш мен учун шараф эди», деб ёзган.
Трамп эса журналистларга Захарияга бу иш ўзига мос келиши ҳақида ўйлаб кўришни таклиф қилганини айтган. Президентнинг сўзларига кўра, ОАВ унга ёмон ва адолатсиз муносабатда бўлган, Захария сўнгги кунларда кўп қийинчиликларни бошдан кечирган. Трамп унинг бахтли бўлишини хоҳлашини ва яқин вақтда у билан суҳбатлашиш ниятида эканини билдирган.
Захариянинг тайинлови 9 октябр куни эълон қилинган эди. Бироқ у илк иш кунидаёқ матбуот анжуманидаги ишончсиз чиқиши ва нутқидаги адашишлари билан эътиборга тушган. Айрим саволларга жавоб бера олмаган ва брифингни белгиланган вақтдан анча олдин якунлаган.
Шунингдек, унинг касбий малакаси ҳақида ҳам саволлар пайдо бўлган. Хабарларга кўра, Захария 2011 йилда Pepperdine University юридик мактабини тамомлаганидан кейин адвокатлик имтиҳонидан ўта олмаган. Шунга қарамай, у аввал ўзини бир неча марта юрист деб атаган, Трамп эса уни адвокат сифатида таништирган.
CBS News маълумотига кўра, Захария ўтган ҳафтани одатдагидан анча яккаланган ҳолда ўтказган ва матбуот котибига хос фаолият олиб бормаган. Politico эса Трамп бошқалар билан суҳбатларда унинг қобилияти ва камера қаршисида ўзини тутиши ҳақида танқидий фикрлар билдирганини ёзган.
