“Долзарб 100 кун”: триллионлаб тежамкорлик, кенгайган бурғилаш ва очиқ қолаётган саволлар

“Ўзбекнефтгаз” АЖ 2026 йил I чораги ва “Долзарб 100 кун” дастури натижаларини эълон қилди. Расмий рақамларга кўра, триллионлаб сўмлик тежамкорликка эришилган, ишлаб чиқариш ҳажми ошган ва йирик геологик, бурғилаш лойиҳалари бошланган. Бироқ мутахассислар бу кўрсаткичлар ортида самарадорликнинг реал иқтисоди ва узоқ муддатлик барқарорлик масалалари ҳам борлигини таъкидламоқда.

Дастур доирасида компания фаолиятида молиявий оптималлаштириш асосий йўналишлардан бири бўлди. Маълумотларга кўра, қисқа муддат ичида:

•  2,5 триллион сўм миқдорида умумий тежамкорлик ва самарадорликка эришилган;
•  1,8 триллион сўм ишлаб чиқарувчилар билан тўғридан тўғри ишлаш ва харажатларни оптималлаштириш орқали тежалган;
•  438 миллиард сўм эса қурилиш ва бурғилаш лойиҳаларини қайта кўриб чиқиш ҳисобига қисқартирилган.

Шунингдек, соҳа билан боғлиқ бўлмаган активларни оптималлаштириш орқали қўшимча 30 миллиард сўм харажат камайтирилгани айтилади.

Геология-қидирув йўналишида ҳам сезиларли кенгайиш кузатилмоқда. 3D сейсмик тадқиқотлар ҳажми 10 минг квадрат километрга етказилиб, бу ўтган йилга нисбатан 4 баробар кўп экани қайд этилган. 42 та инвестиция блоки бўйича рухсатномалар олинган.

Жорий йилда “Ўзбекнефтгаз” тарихидаги энг йирик бурғилаш дастури амалга оширилиши режалаштирилган. Умумий ҳисобда 102 та қудуқ бурғилаш кўзда тутилган бўлиб, шундан 57 таси қидирув, 45 таси ишлатиш қудуқлари ҳисобланади.

Бурғилаш жараёнларида вақт меъёрларини қайта кўриб чиқиш, технологик жараёнларни оптималлаштириш ва норматив ҳужжатларни янгилаш орқали таннархни камайтириш ҳамда самарадорликни ошириш вазифалари белгиланган.

Ҳисобот даврида 17 та қудуқдан саноат миқёсида газ оқими олинган, Қорақалпоғистонда 3 та янги кон аниқланган. Бундан ташқари, 29 та қудуқ таъмирланган ва 11 та технологик тадбир амалга оширилган.

Ишлаб чиқариш кўрсаткичлари бўйича ҳам ўсиш қайд этилган:

•  тозаланган табиий газ – 4,789 млрд м³
•  газ конденсати – 141,3 минг тонна
•  суюлтирилган газ –152,9 минг тонна
•  олтингугурт – 48 минг тонна
•  полиэтилен – 36,1 минг тонна

“Uzbekistan GTL” заводида синтетик нефт маҳсулотлари ишлаб чиқариш ҳажми ўтган йилга нисбатан 169 фоизга ошгани айтилади.

“Долзарб 100 кунлик” дастури доирасида инвестиция сиёсатини қайта кўриб чиқиш бошланган. Мутахассисларга кўра, лойиҳалар иқтисодий самарадорлик ва стратегик аҳамият асосида баҳоланмоқда.

Халқаро ҳамкорлик доирасида Хитой компаниялари билан геология-қидирув ва бурғилаш технологияларини ривожлантириш бўйича музокаралар олиб борилган. Жумладан, 2026–2028 йилларда 14 300 квадрат километр ҳудудда геологик тадқиқотлар ўтказиш бўйича келишувга эришилгани маълум қилинди.