Тошкент — Гуанчжоу рейси чақмоқ уриши сабабли кечикди

Centrum Air авиакомпанияси 16 май куни амалга оширилиши режалаштирилган Тошкент — Гуанчжоу — Тошкент йўналишидаги C6511D/C6512D рейслари ҳаво кемасини чақмоқ ургани сабаб кечиктирилганини маълум қилди. Авиакомпанияга кўра, ҳодисадан сўнг самолёт зудлик билан техник кўрикка олинган ва хавфсизлик талабларидан келиб чиқиб, бошқа ҳаво кемаси жалб қилинган.

Расмий баёнотда таъкидланишича, ҳаво кемаси олдинги рейс вақтида чақмоқ таъсирига учраган. Амалдаги авиация стандартларига мувофиқ, самолёт тўлиқ диагностика ва техник текширувдан ўтказиш учун парвозлардан четлаштирилган.

Текширув якунларидан сўнг авиакомпания мазкур йўналиш учун бошқа ҳаво кемасини ажратишга қарор қилган.

Мажбурий кутиш даврида барча йўловчилар меҳмонхонага жойлаштирилиб, уч маҳал овқат билан таъминлангани айтилди.

Янгиланган жадвалга кўра, C6512D рейси 18 май куни маҳаллий вақт билан соат 20:25 да Гуанчжоудан учиб, 19 май куни 00:50 да Тошкентга етиб келиши режалаштирилган.

Centrum Air юзага келган ноқулайликлар учун йўловчилардан узр сўраб, хавфсизлик ҳар доим авиакомпания учун энг устувор масала бўлиб қолишини билдирган.