Ҳафта давомида кутилаётган об-ҳаво билан иқлимшунос Эркин Абдулаҳатов таништиради.
Об-ҳаво ўзгаришларининг саломатликка таъсири. Ҳафта бошида тунги ҳарорат Қорақалпоғистон ва Хоразмда −2…+3 даража, Тошкент ва марказий вилоятларда +3…+8 даража, жанубда +5…+10 даража бўлиши кутилмоқда. Кундузи ҳарорат +20…+25 даражагача кўтарилиши мумкин. Шу боис, айниқса, кексалар, болалар ҳамда нафас олиш ва юрак-қон томир касалликлари бор кишилар эрталабки совуққа мос кийиниши ва узоқ вақт очиқ ҳавода қолмаслиги тавсия этилади.
Айрим шаҳарларда шамол сусайиб, тунги ҳарорат инверсияси юзага келса, PM2.5 ва PM10 заррачаларининг ерга яқин қатламда тўпланиш хавфи ортиши мумкин. Буни баҳолашда жорий ҳаво сифати кўрсаткичлари ва шамол тезлигини кузатиш муҳим.
Қишлоқ хўжалиги. Текисликларда ёғингарчилик кутилмаётгани мавсумий дала ишларини давом эттиришга қулай шароит яратиши мумкин. Бироқ қуруқ давр узайса, тупроқ намлиги камайиши эҳтимоли бор. Шунинг учун кузги экинлар майдонларида намликни назорат қилиш ва суғоришни заруратга қараб режалаштириш лозим.
Шимол ва тоғли ҳудудларда нолдан паст ҳарорат совуққа сезгир экинлар, сабзавотлар ва кечки ҳосилга таъсир қилиши мумкин. Деҳқонлар маҳаллий прогнозларни кузатиб, зарур ҳимоя чораларини кўриши мақсадга мувофиқдир. Ҳафта охирида тоғолди ва тоғларда кутилаётган ёғинлар дала ишларини об-ҳавога қараб режалаштиришни талаб этади. Умуман, тупроқ намлигини назорат қилиш, экинларни совуқдан ҳимоялаш ва суғориш сувидан оқилона фойдаланиш муҳим.
