Наслдор қорамол олиб кириш учун солиқ имтиёзи жорий этилди

Ўзбекистонда чорвачилик тармоғини ривожлантириш ва маҳсулдорликни ошириш мақсадида хориждан наслдор қорамол, қўй ва эчкиларни импорт қилиш қўшилган қиймат солиғидан озод этилади. Шунингдек, аҳоли хонадонларида олинган наслдор бузоқлар учун субсидия ажратиш тизими йўлга қўйилади.

Президентнинг “Чорвачилик тармоғи ва яйлов хўжалигини замонавий бошқарув тизими ва янгича ёндашувлар асосида ривожлантириш чора-тадбирлари тўғрисида”ги ПҚ–179-сон қарори қабул қилинди.

Қарорга мувофиқ, 2026–2028 йилларда чорвачилик тармоғини ривожлантиришнинг асосий мақсадли кўрсаткичлари белгиланган. Жумладан, гўшт ва сут маҳсулотларини саноат усулида қайта ишлаш даражасини 50 фоизга етказиш ҳамда наслдор қорамоллар улушини 90 фоизгача ошириш режалаштирилган.

Ҳужжатга кўра, 2027 йил ҳосилидан бошлаб пахта ва бошоқли дон экинлари жойлаштирилиши режалаштирилган ер майдонларининг 50 фоизига озуқабоп экинлар экишга рухсат берилади.

Шунингдек, 2026 йил 1 июлдан 2030 йил 1 январга қадар аҳоли хонадонларида идентификация қилинган сигирлардан олинган ҳар бир наслдор бузоқ учун субсидия ажратилади.

Хусусан:

— сунъий уруғлантириш орқали олинган наслдор бузоқ учун 500 минг сўм;

— эмбрионларни кўчириб ўтказиш (трансплантация) орқали олинган наслдор бузоқ учун 700 минг сўм субсидия берилади.

Бундан ташқари, 2026 йил 1 июндан 2029 йил 1 январга қадар хориждан наслдор қорамол, қўй ва эчкиларни Ўзбекистонга олиб кириш қўшилган қиймат солиғидан озод этилади.