Таққослашда давлатларнинг солиқ тушумлари иқтисодиёт ҳажмига — ялпи ички маҳсулотга нисбатан ҳисобланган. Бу рақамлар фуқаро ёки корхона ўз даромадининг айнан шунча қисмини солиққа тўлайди, дегани эмас.
Келтирилган маълумотларга кўра, кўрсаткичлар қуйидагича:
Дания — ЯИМнинг 45,3 фоизи;
Канада ва Австралия — қарийб 29 фоиздан;
АҚШ — 19,5 фоиз;
Россия — 19,2 фоиз;
Қатар, Баҳрайн ва Уммон — 5 фоиздан кам;
Кувайт — 1,4 фоиз.
Бундай фарқлар солиқ тизимлари, иқтисодий ривожланиш даражаси ва давлатнинг бошқа даромад манбалари билан боғлиқ.
Скандинавия мамлакатларида солиқ базаси одатда кенг бўлиб, тушумлар йирик давлат дастурларини молиялаштиришга хизмат қилади. АҚШда эса соғлиқни сақлаш ва пенсия таъминоти каби соҳаларда хусусий харажатларнинг ўрни каттароқ.
Нефтга бой давлатларда бошқа даромад манбаи бор
Кувайт, Қатар, Баҳрайн ва Уммон каби мамлакатларда солиқ тушумларининг ЯИМдаги улуши нисбатан паст.
Йирик нефт ишлаб чиқарувчилар учун табиий ресурслар давлат даромадларининг муқобил манбаи ҳисобланади. Шу боис солиқ тушумларининг пастлиги бюджетнинг жами даромади ҳам кам эканини англатмайди.
Кам тушумнинг сабаби ҳамма жойда бир хил эмас
Даромади паст мамлакатларда эса солиқ тушумларининг камлиги бошқа омиллар билан изоҳланиши мумкин. Жумладан, норасмий иқтисодиётнинг катталиги ва давлатнинг солиқ йиғиш имкониятлари чеклангани бунга таъсир қилади.
