Ўзбекистон генератив сунъий интеллектдан фойдаланиш даражаси паст бўлган давлатлар қаторига кирди

Ўзбекистон генератив сунъий интеллектдан фойдаланиш бўйича глобал рейтингнинг қуйи қисмида қолмоқда. Генератив сунъий интеллект (Generative AI) - бу мавжуд контентни шунчаки таҳлил қилиш ёки таснифлаш эмас, балки янги контент яратишни биладиган сунъий интеллект синфидир.

2026 йил биринчи чорагида республика меҳнатга лаёқатли аҳолисининг 7,2 фоизи генератив сунъий интеллектдан фойдаланган. Бу дунёдаги ўртача кўрсаткичдан икки ярим баравар пастдир. Бундай маълумотлар Microsoft компаниясининг Global AI Diffusion Report янги ҳисоботида (.pdf) келтирилган.

Тадқиқотга кўра, 2026 йил биринчи чорагида дунёда генератив сунъий интеллектдан фойдаланувчилар улуши меҳнатга лаёқатли аҳолининг 16,3 фоизидан 17,8 фоизига ошган. Microsoft сунъий интеллектнинг тарқалишини ҳисобот даврида генератив сунъий интеллект маҳсулотларидан фойдаланган 15 ёшдан 64 ёшгача бўлган одамларнинг улуши сифатида баҳолайди.

Ўзбекистонда бу кўрсаткич 7,2 фоизни ташкил этди. Марказий Осиё давлатлари орасида энг юқори кўрсаткич Қозоғистонда - 15,9 фоиз. Кейинги ўринларда Қирғизистон — 9,5 фоиз, Тожикистон ва Туркманистон - 6,1 фоиздан. Глобал рўйхатда Ўзбекистон 142-ўринни эгаллади.

Жаҳон рейтингида Бирлашган Араб Амирликлари етакчилик қилмоқда, бу ерда меҳнатга лаёқатли аҳолининг 70,1 фоизи генератив сунъий интеллектдан фойдаланади. Иккинчи ўринни 63,4 фоиз кўрсаткич билан Сингапур эгаллади. Кучли бешликка Норвегия, Ирландия ва Франция ҳам кирди.

Microsoft компаниясининг таъкидлашича, дунёда сунъий интеллектни жорий этиш нотекис кечмоқда. Глобал Шимол мамлакатларида аҳолининг 27,5 фоизи, Глобал Жануб мамлакатларида эса 15,4 фоизи генератив сунъий интеллектдан фойдаланади. Бу гуруҳлар ўртасидаги тафовут тобора ортиб бормоқда.

Компания буни интернетга кириш, электр таъминоти ишончлилиги, рақамли инфратузилма сифати ва рақамли кўникмалар даражасидаги фарқлар билан боғлайди.

Ҳисоботда Осиёда сунъий интеллект фаоллигининг тез ўсиши алоҳида қайд этилган. Microsoft маълумотларига кўра, 2025 йил июнь ойидан бошлаб сунъий интеллектдан фойдаланиш энг тез ўсиб бораётган 15 та иқтисодиётдан 12 таси айнан Осиёда жойлашган. Улар орасида Қозоғистон, Қирғизистон ва Ўзбекистон ҳам бор.