2 сентябр куни АҚШ пойтахти Вашингтонда Ўзбекистон мустақиллигининг 35 йиллиги тантанали нишонланди. Тадбирда АҚШ ҳукуматидан расмийлар, дипломатик корпус вакиллари ҳамда ватандошлар қатнашди. Kun.uz билан гаплашган элчи Фурқат Сидиқовга кўра, Вашингтон Тошкентни Марказий Осиёдаги асосий шерик сифатида кўрмоқда ва ҳозирги алоқалар кейинги маъмуриятлар даврида ҳам сақланиб қолади.
Бу йилги мустақиллик байрами нафақат Ўзбекистоннинг ўзида, балки республиканинг ҳамкор давлатлари, ўзбеклар кўп яшайдиган нуқталарда ҳам кенг нишонланмоқда. Масалан, АҚШнинг 10 дан ортиқ штатларида турли тадбирлар ўтказилди. 2 сентябр куни эса асосий байрам Вашингтонда ташкил қилинар экан, унда америкалик расмийлар, дипломатик корпус вакиллари ҳамда Америкада яшовчи юртдошларимиз қатнашди.
Элчи Фурқат Сидиқов нутқ сўзлаб, йиғилганларни байрам билан қутлади. Бундан ташқари, АҚШ давлат котибининг Марказий Осиё бўйича ёрдамчиси Паул Капур, савдо бўйича палата вакиллари қатнашди. Улар Ўзбекистонни керакли ҳамкор дея атади.
Kun.uz билан гаплашган Ўзбекистоннинг АҚШдаги элчиси Фурқат Сидиқовга кўра, Вашингтон Тошкентни Марказий Осиёдаги асосий ҳамкор сифатида тан олмоқда. Хўш, ҳозирги алоқалар фақат Трамп администрацияси биланми ёки бундан кейин ҳам бардавом бўладими?
“Алоқаларимиз институционаллашди, АҚШ Ўзбекистоннинг дунёга очилаётгани, янгиланаётганини кўрди. Шунинг учун биз ҳозирги ҳамкорлигимизни узоқ муддатли пойдевор билан қурганмиз”, дейди элчи.
Бундан ташқари, дипломатнинг қўшимча қилишича, президент Мирзиёевнинг Трамп ташаббуси билан қурилаётган “Америка қаҳрамонлари” боғи учун иккита айвонни совға қилгани ҳам катта воқелик.
“Баҳорда у боғда сакура дарахти жуда чиройли гуллайди, бу Япония императоридан совға. Энди унинг ёнида бизнинг президент совғаси бўлган айвонлар ҳам туради”, дейди элчи.
Шунингдек, Kun.uz билан гаплашган Ню Йоркдаги бош консул Жамил Шараповнинг айтишича, Ватанга бўлган муҳаббатгина ўзбекларни бугун бирлаштирмоқда.
Яна бир ўзбек тадбиркори эса охирги йилларда ўзбек ватандошларимиз учун кўплаб концертлар уюштирилаётгани, аммо виза олиш масалаларидаги қийинчиликлар сабаб режалар доим ҳам силлиқ кечмаётганини айтди.
“Оppenheimer” инвестиция компанияси Капитал бозорлари департаменти раҳбари Фарҳод Иноғомбоевга кўра, эса бугун Ўзбекистонга АҚШ керак, АҚШга эса Ўзбекистон керак.
“Қаранг, Ўзбекистоннинг аҳолиси сони ошиб бормоқда, бу катта бозор. Шунингдек, ноёб минерал ресурслар ва табиий қазилмалар, кончилик бугун АҚШ ҳукумати учун доимгиданда қизиқ”, дейди у.
