АҚШнинг ESPN телеканали 2026 йилги мундиал иштирокчиларининг уй ва сафар либосларини ўрганиб, уларнинг рейтингини тузди. Ўзбекистон миллий жамоасининг оқ рангли асосий либоси 105 та форма орасида 103-ўринда, кўк рангли сафар формаси эса 84-ўринда қайд этилди.
Спорт соҳасида жаҳондаги энг нуфузли медиалардан бири – ESPN футбол бўйича 2026 йилги жаҳон чемпионати иштирокчиларининг экипировкалари дизайнига баҳо бериб, мундиал либослари рейтингини тузди.
Телеканал барча 48 та миллий жамоанинг уй ва сафар либослари, шунингдек, яна 9 та жамоанинг учинчи даражали либосларини кўриб чиққан.
Рейтингда Ўзбекистон миллий жамоасининг 7Saber бренди томонидан ишлаб чиқилган оқ рангли асосий формаси 105 та форма орасида 103-ўринда, кўк рангли сафар формаси эса 84-ўринда қайд этилган.
“Ўзбекистон миллий жамоасининг уй учрашувлари учун мўлжалланган формаси асосан оқ рангда ишланган бўлиб, унда тўқ кўк рангли нозик безак чизиқлари қўлланган. Йўл-йўл ёқа қисмида мамлакат байроғи ранглари акс этган. Матода эса анъанавий сўзана каштачилиги ва тўқимачилик санъатидан илҳомланган мозаикасимон нақшлар жой олган”, – дейилади мақолада.
ESPN Ўзбекистоннинг асосий формасига қараганда сафар либосига юқорироқ баҳо берганини изоҳларкан, матодаги сўзана нақшлари ва ёқа қисмига туширилган байроқ ранглари оқдан кўра, кўк фонга кўпроқ мос тушганини қайд этган.
Маълумот учун, Ўзбекистон Футбол ассоциацияси миллий жамоанинг мундиалдаги илк иштироки муносабати билан экипировка масаласида йирик халқаро брендлар билан ҳамкорлик масаласини кўриб чиққани ёки йўқлиги маълум эмас. Ассоциация 2025 йил 15 августдаги баёнотида Ўзбекистон терма жамоалари бундан буён 7SABER бренди ишлаб чиққан либосларда тўп суришини эълон қилган.
7SABER брендига 2019 йилда Ўзбекистонда асос солинган бўлиб, 2021 йил июн ойида Тошкентда расман тақдим этилган. 2020 ва 2024 йиллардаги олимпиадаларда Ўзбекистон терма жамоалари айни шу бренд либосларида иштирок этган эди.
