Футболчиларимдан ғурурланаман, улар Колумбияга қарши яхши ўйнади - Каннаваро

Миллий жамоа бош мураббийи Колумбияга қарши мағлубиятли ўйинга изоҳ берди.

Фото: ЎФА

Ўзбекистон миллий жамоаси бош мураббийи Фабио Каннаваро ЖЧ-2026 гуруҳ босқичидан ўрин олган Колумбияга (1:3) қарши ўйиндан кейин ўз фикрларини айтди.

— Ўйин қизиқарли ўтди. Иккинчи бўлимда биз ўйинни ўзгартиришга эришдик. Чап қанотдан имкониятлар яратдик. Ўйин назоратини ўз қўлимизга олишга ҳаракат қилдик.

Авваламбор биз Ўзбекистонни бутун дунёга ижобий намойиш этиш учун бу ерга келдик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари жамоаларга қарши ўйнаш, тўпсиз ҳаракат қилиш осонмас. Умуман олганда, иккинчи бўлимда яхши ҳаракат қилдик, бироқ афсуски гол ўтказиб юбордик.

Биз бу стадионда ўтган ушбу ўйинни эслаб қоламиз. Чунки бу тарихий ўйин. Биз Жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз.

— Футболчиларимдан ғурурланаман. Улар яхши ўйнади. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин.

Ўзбекистон миллий жамоаси навбатдаги ўйинни 23 июнь куни Португалияга қарши ўтказади.