Жорий йилнинг 2 ноябр куни Тошкентнинг “Пахтакор” клуби Элит Чемпионлар лигаси 4-тури доирасида Саудиянинг “Ан-Наср” жамоасини ўз уйида қабул қилади.
Ўйиндан аввал турнир жадвалига эътибор қаратадиган бўлсак, “Ан-Наср” икки ўйин ўтказиб, 3 очкога эга бўлиб турибди. “Пахтакор” эса 3 та ўйинда 2 та дуранг ва 1 мағлубият билан 2 очкога эга. Роналду жамоадошлари мусобақани “Ал-Айн”дан йирик 4:0 ҳисобидаги йирик мағлубият билан бошлади. 2-турда эса Фарғонанинг “Нефтчи” клубини 3:1 ҳисобида енгди. 26 октябр куни 3-турда “Ан-Наср” ўз уйида “Ал-Васл”ни қабул қилиши керак эди, бироқ минтақадаги нотинчлик ортидан ушбу ўйин номаълум муддатга қолдирилди.
Омадсиз старт “Ан-Наср”га Тошкентга иккинчи таркибини жўнатиш имкониятини бермайди. Маълум бўлишича, саудияликлар Тошкент клуби расмийларига мурожаат қилиб, хавфсизликни тўлиқ таъминлай олиши билан қизиққан. Бироқ португалиялик юлдузнинг Тошкентга келиши ёки келмаслиги – унинг ўзи билан боғлиқ эканлиги ҳам аниқроқ.
Қайд этиш жоиз, 2-турда “Нефтчи” ва “Ан-Наср” ўртасидаги баҳс 1 соат кеч бошлаганди. Бунга яман ҳусийчиларининг эҳтимолий ракета ҳужуми ҳақидаги хабарлар сабаб бўлган. Ўша воқеани жонли кузатган Kun.uz манбаларининг айтишича, ўйин старти аввалида футболчиларнинг мобил телефонларига кетма-кет огоҳлантирувчи хабарлар келгач, Криштиану майдонга чиқишдан бош тортган. “Ан-Наср” раҳбарияти футболчига деярли 40 дақиқа давомида мухлислар уни кўриш учун келгани ва чипта сотиб олганини тушунтиришга уринган. Бироқ футболчи анча вақт рози бўлмайди, аммо 1 соатдан сўнг вазият юмшаганини кўргач майдонга тушишга кўнган.
Бундан кўринадики, “Ан-Наср” раҳбарияти ҳар бир учрашувда Роналдунинг майдонга тушишидан манфаатдор, бироқ сўнгги сўз футболчининг ўзида қолган.
Вазиятга Роналду томондан назар ташласак, Криш 41 ёшда. Унинг “Ан-Наср” билан тузган шартномаси 2027 йилнинг 30 июнида якунига етади. У яқинда Vogue журналига берган интервьюсида бу унинг футболдаги сўнгги йили эканлиги ҳақида гапириб, ўзидан ажойиб мерос қолдирмоқчилигини айтганди.
Роналдунинг 1000 та голли давон забт этилишига оз қолди. Португалиялик афсонанинг ҳисобида ҳозир 982 та гол мавжуд бўлиб, маррани забт этиш учун 18 та гол етмаяпти, холос. Шартнома якунланишига эса, тахминан, 8 ой вақт қолган. Футболчи, бу голларни расмий ўйинларда уришга интилаётганини ҳисобга олсак, “Ан-Наср”нинг ҳар бир ўйини португалиялик учун имконият ҳисобланади.
