Москвадаги Кудрин майдонида портлаш рўй берди. Бу ҳақдаги маълумотни Москва ИИВ бош бошқармаси тасдиқлади. Baza нашри аниқлик киритишича, портлаш кўп қаватли уйлардан бирининг биринчи қаватида жойлашган «Balzi Rossi» ресторанида рўй берган.
Ресторан 1 август куни бошқа мижозлар учун ёпиқ эди. «112» телеграм-канали ёзишича, бу ер «50 кишилик банкет» учун банд қилинган. Astra гувоҳларга таяниб, ресторанда «генералнинг туғилган куни нишонланаётгани» тўғрисида хабар тарқатган.
Дастлабки хабарларда портлашга газ қурилмасидаги чақин сабаб бўлгани айтилганди. Аммо кўп ўтмай Миллий аксилтеррор қўмитаси ресторанга кириш жойида номаълум аёл ичкарига олиб киришга уринган қўлбола бомба портлаб кетганини маълум қилди. Уни қўриқчи ичкарига киритмаган. Уларнинг иккиси ва меҳмонлардан яна бири ҳалок бўлган, 21 киши тан жароҳати олган.
«Коммерсант» маълумотига кўра, портлаш «қаттиқ қўриқланган» зиёфат вақтида рўй берган. Металл шарли бомба масофадан туриб портлатилган. Дастлабки тахминларга кўра, уни олиб келган аёл қути ичида нима борлигидан бехабар бўлган – у қўриқчига совға олиб келганини тушунтиришга ҳаракат қилган. Ҳолат юзасидан Жиноят кодексининг 205-моддаси (Террорчилик акти) билан жиноят иши қўзғатилган.
Ушбу теракт нишони, катта эҳтимол билан, Россия Ҳарбий-космик кучлари бошлиғи, генерал Александр Чайко эди. Ресторан ичида портлашдан олдинроқ олинган видеолардан бирида кадр ортидаги овоз «Александр 55 ёшга чиққани, бунга катта тайёргарлик кўрилаётгани» ҳақида гапирган. 27 июл куни Александр Чайко 55 ёшга чиққанди.
Шу билан бирга, у 2026 йил май ойида Россия Ҳарбий-космик кучлари бошлиғи этиб тайинланганди. Чайко Россиянинг Украинага қарши катта урушининг дастлабки даврида Бучада ҳарбий жиноятлар содир этган Шарқий ҳарбий округ қўшинларига раҳбарлик қилган.
«ВЧК-ОГПУ» телеграм-каналига кўра, зиёфатга ФХХнинг юқори мартабали ходимлари, Мудофаа вазирлиги генераллари, депутатлар ва бошқа амалдорлар ташриф буюрганди. Чайко туғилган куни ва янги лавозимга тайинланганини бирга нишонламоқчи бўлган.
Полиция портлаш содир бўлган бино атрофидаги майдонни ўраб олган. Москва транспорт департаменти кечқурун бошланиши ва Садовой ҳалқаси бўйлаб ўтиши керак бўлган Тунги велоспорт фестивали «кутилмаган ҳолатлар туфайли» бошқа санага кўчирилганини маълум қилди.
