Трамп бу ҳақда The Financial Times нашрига берган интервюсида маълум қилди. У Patriot тизимларини «ўта ноёб қурол» деб атаб, АҚШ бундай ҳарбий технологияларга лицензия беришда жуда эҳтиёткор ёндашишини таъкидлади.
«Бу жуда муҳим қурол. Лицензияларни кимга бериш масаласида эҳтиёткор бўлишимиз керак. Умуман олганда, биз ҳарбий ускуналар учун лицензияларни тез-тез бермаймиз», — деди АҚШ президенти.
Бу баёнот Трампнинг Украина президенти Володимир Зеленский билан Оқ уйда ўтказган учрашувидан икки кун ўтиб янгради. Зеленский мазкур мулоқотни самарали деб баҳолаб, унда Patriot тизими учун тутиб қолувчи ракеталарни биргаликда ишлаб чиқариш ва бошқа мудофаа лойиҳалари муҳокама қилинганини айтган эди. Шунингдек, у Patriot ишлаб чиқарувчи компаниялар вакиллари билан ҳам учрашганини маълум қилиб, қўшма ишлаб чиқариш йўлга қўйилишига умид билдирган.
Маълумот учун, Patriot тизимлари АҚШнинг Lockheed Martin ва RTX компаниялари томонидан ишлаб чиқарилади.
Трамп интервю давомида АҚШнинг асосий мақсади Украинага янада кўпроқ қурол етказиб бериш эмас, балки Россия ва Украина ўртасидаги урушни якунлаш эканини таъкидлади. Унинг айтишича, АҚШ президентининг махсус вакили Стивен Уиткофф ҳамда Жаред Кушнер яқин кунларда биринчи марта Украинага ташриф буюради.
«Биз ракеталар ҳақида эмас, урушни тўхтатиш ҳақида ўйлаяпмиз. Бизга тинчлик керак», — деди Трамп.
Шу билан бирга, Россиянинг навбатдаги оммавий ҳужумларидан сўнг Украина президенти Володимир Зеленский халқаро ҳамкорларга ҳаво ҳужумидан мудофаа воситалари бўйича ёрдам сўраб мурожаат қилди. Унинг маълум қилишича, Россия бир кечада Украинага 70 дан ортиқ ракета, асосан баллистик ракеталар, ҳамда 280 дан зиёд зарбали дронларни учирган.
Зеленскийнинг таъкидлашича, мамлакат аҳолиси хавфсизлиги кўп жиҳатдан ҳамкор давлатларнинг, айниқса Patriot тизимлари учун ракета захирасига эга АҚШ ва бошқа мамлакатларнинг кўмагига боғлиқ.
