Байкалортида бензинга улкан навбат юзага келди

«Роснефт»нинг Чита районидаги заправкаси олдида тўрт километрлик навбат ҳосил бўлган – юқоридан олинган видеода тахминан 800 та автомобил навбатда тургани акс этган. Ҳудудда яшовчилардан бири 36 соат давомида навбатда турганини айтган.

Евгений Епанчинцев / РИА Новости / Sputnik / Profimedia

Россиянинг барча ҳудудлари бўйлаб ёқилғи тақчиллиги билан боғлиқ вазият оғирлашишда давом этмоқда.

Украинадаги Exilenova+ ва Supernova+ телеграм-каналлари 2 июл куни Россия ҳудудидаги автомобилларга ёқилғи қуйиш шохобчаларидан бирида кўп километрлик навбат юзага келгани акс этган видео жойлаштирилди. Постда бу видео қачон олинганига аниқлик киритилмаган.

Бу видео Байкалорти ўлкасининг Чита районида тасвирга олингани маълум бўлди. «Медуза» видеонинг ҳақиқийлигини тасдиқлаган: бу кадрлар «Роснефт»нинг Чита райони Атамановское посёлкаси ҳудудига оид. Видеода навбат километрга чўзилгани, у ерда 800 га яқин автомобил навбатда турганини кўриш мумкин.

Байкалорти ўлкаси раҳбарияти Украина дронларининг нефтни қайта ишлаш заводларига зарбаларидан кейин юзага келган ёқилғи инқирози туфайли 25 июн куни регионда юқори шайлик режими жорий этганди. Натижада ўлка аҳолиси автомобилларга ёнилғи қуйиш шохобчаларида соатлаб навбат кутиб турмоқда, ҳайдовчилардан бири 30 июн куни 36 соатдан буён навбат кутаётганини айтган.

Юқоридаги видеода кўрсатилган заправка «Роснефт»га тегишли бўлиб, у ерга Хабаровскдаги нефтни қайта ишлаш заводидан ёқилғи етказиб берилади. Украина ушбу корхонага ҳали зарба бермади.