Халқаро валюта жамғармаси Ўзбекистоннинг де-факто валюта курсини “секин ўзгарувчи” (crawl-like) режимдан “сузувчи” (floating) режимга қайта таснифлади.
Бу ҳақда ХВЖ миссиясининг Ўзбекистонга 2026 йилги ташрифи якунлари бўйича ҳисоботида маълум қилинган.
Қайд этилишича, 2025 йил апрелидан бошлаб валюта курси мослашувчанлиги ошганидан келиб чиқиб, Ўзбекистоннинг де-факто валюта курси 2025 йил 8 майдан эътиборан “сузувчи” режимда дея эътироф этилган.
Халқаро ташкилотга кўра, иқтисодиётнинг ташқи шокларга чидамлилигини ошириш, халқаро захираларни асраш, валюта рискларини суғурталаш (ҳеджирлаш)ни рағбатлантириш ҳамда инфляцион таргетлаш режими самарадорлигини таъминлаш мақсадида валюта курсининг “сузувчи” режимини сақлаб қолиш тавсия этилади.
Шу мақсадда ХВЖнинг Пул-кредит ва капитал бозорлари департаменти томонидан валюта бозори фаолиятини такомиллаштириш бўйича берилган техник кўмак тавсияларини амалга ошириш, жумладан, ихтиёрий интервенциялар улушини камайтириш учун хавфларга асосланган, аниқ белгилаб қўйилган валюта интервенцияси стратегиясини жорий этиш тавсия этилган.
Таъкидланишича, валюта бозори ликвидлигини чуқурлаштириш ликвидликни янада самарали бошқариш имконини беради ҳамда стерилизация харажатларини камайтиради.
